Diretór Diresaun Nasionál Organizasaun Urbana, Hermínio Moniz Ribeiro. Imajen Tatoli/Julia Chatarina

DILI, 09 marsu 2020 (TATOLI)–Tuir Diretór Diresaun Nasionál Organizasaun Urbana, Hermínio Moniz Ribeiro informa, to’o agora munisípiu tolu ne’e mak seidauk bele hetan reseita hosi publisidade tanba ne’e Governu hanoin atu implementa publisidade iha munisípiu hanesan Bobonaro, Lautem no Viqueque maibé sei hein prosesu administrasaun balu ne’ebé presiza.

“Munisípiu tolu ne’e to’o agora seidauk hetan reseita hosi publisidade, tanba ne’e ami planu ona atu implementa tan munisipiu tolu ne’e maibé sei hein prosesu administrasaun balu mak sei falta iha ne’ebá maibé entermus de rekursu no estrutura kompleta hotu ona atu hala’o de’it serbisu,” dehan Hermínio Moniz Ribeiro ba Ajénsia TATOLI liuhosi entrevista iha nia knar fatin, Caicoli, Dil, segunda (09/3/2020).

Nia hatutan, kompania ne’ebé mak hakarak tau sira-nia publisidade iha munisípiu tolu ne’e entaun hahú selu ona taxa. Tanba munisípiu 10 seluk komesa selu ona taxa husi publisidade ba munsípiu.

Bainhira administrasaun loos hotu ona, nia dehan, mak sei fó avizu ba kompañia sira ne’ebé mak monta ona publisidade maibé daudaun ne’e sira sei iha prosesu gratuita nian laran.

Aleinde monta publisidade, Diretór ne’e esplika, kustu publisidade ne’e la hanesan tanba haree ba nia kategória balu hanesan kategória dalan avenida, travesa, rua no beco.

“Ita mós haree ba kategória hirak ne’e tanba bainhira sira monta publisidade iha Avenida entaun nia kustu boot tanba iha estrada públiku. Maibé seluk ne’e la’e tanba publisidade monta fali iha dalan sanak kiik no beco (gang) laran entaun kustu ne’e kiik no ita mós sei haree ba kustu publisidade nia medida”, nia esplika.

Notísia Relevante: Tinan 2019, MAE Hatama Reseita Publisidade Hamutuk $144.147 ba Kofre Estadu

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here