Tribunal Distritál Dili

DILI, 12 marsu 2020 (TATOLI) – Prokuradór Osório de Deus, ne’ebé reprezenta Ministériu Públiku,  husu ba iha Juis koletivu António Fonseca, Afonso Carmona, Patricia Xavier,  atu aplika pena prizaun tinan sia (9) ba arguidu CT ne’ebé komete krime lori katana sona lezadu Albano, hanesan arguidu nia-primu hosi aman maun-alin rasik.

Notísia Relevante : Fahi Tama Toos, Arguidu CT Taa Nia Primu AM

Aktu agresivu arguidu nian ne’e rezulta Albano kanek boot no nia tee-oan kotu ba haat. Kazu ne’e akontese iha area Munisípiu Ermera, foin lalais ne’e.

Liuhosi audiénsia julgamentu iha Tribunál Distritál Dili (TDD) , ohin, Ministériu Públiku akuza arguidu ho krime Omisídiu Simples ho forma atentadu ne’ebé previstu no punidu iha artigu 138 no artigu 23 Kódigu Penál Timor-Leste.

Prokuradór Osório de Deus iha nia alegasaun finál husu atu aplika pena ne’e tanba razaun iha produsaun prova iha julgamentu-sira liu-ba arguidu deklara loloos kona-ba aktu ne’ebé nia halo hasoru lezadu Albano.

Defensór Públiku Nelson Borges, ne’ebé fó asisténsia legál ba arguidu, husu tribunal atu haree didi’ak sirkunstánsia sira molok foti desizaun.

Nia dehan, deklarasaun arguidu nian antes nee konfesa ho loloos ba tribunal kona-ba faktu ne’ebé nia halo no arguidu ho lezada rasik rekoñese katak sira dame malu ona. Nune’e, arguidu rasik fó sala no multa osan montante $1.000.00 ba lezadu.

Rona tiha alegasaun finál hosi MP Juiz koletiva deside adia fila-fali julgamentu ne’e ba loron 30 marsu 2020, tuku 16:00 Otl, hodi rona leitura sentensa.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here