Ministru Obra Públika, Salvador Eugênio Soares dos Reis Pires. Imajen Tatoli/Egas Cristovão

DILI, 12 marsu 2020 (TATOLI) – Ministériu Obra Públika (MOP) iha tinan ne’e sei harii Komisaun Instaladora, ne’ebé kompostu husi Komisaun Funsaun Públika (KFP), Gabinete MOP no Diresaun Jerál Administrasaun no Finansa MOP, durante prosesu tranzisaun Eletricidade de Timor-Leste (EDTL) muda estatutu ba Empreza Públika (EP).

Ministru Obra Públika, Salvador Eugénio Soares dos Reis Pires, informa komisaun ne’e hodi haree regulamentu balun ba EDTL no transformasaun funsionáriu sira hafoin muda estatutu efetivamente iha tinan oin.

“Ita kria Komisaun Instaladora iha tinan ne’e hodi haree regulamentasaun EDTL hanesan Empreza Públika no mós haree ba rekrutamentu pesoál sira iha empreza estatál foun ne’e. Nune’e bele haree oinsá mak rekruta pesoál sira no halo transferénsia husi Funsionáriu Públiku iha EDTL ba Empreza Públika”, tenik Ministru Salvador ba Agência Tatoli iha ninia knaar fatin, Caicoli, kinta ne’e.

Inisiativa ne’e hafoin Governu liuhosi reuniaun Konsellu Ministru iha kuarta ne’e deside EDTL sai EP.

Notísia Relevante: Governu Deside EDTL Sai Empreza Públika

Governante ne’e realsa, ba Funsionáriu Públiku ne’ebé dadaun servisu iha EDTL sei fó opsaun atu hili mantein sai Funsionáriu Públiku ka muda ba Empreza Públika.

Enkuantu daudaun ne’e, funsionáriu EDTL hamutuk iha na’in-500.

“Maibé ida-ne’e ita sei halo levantamentu dadus no mós sosializasaun ba sira no haree opsaun saida maka sira hakarak hili. Tanba ne’e ita sei servisu hamutuk ho KFP”, nia akresenta.

Salvador adianta, Komisaun Instaladora ninia servisu maka sei haree ba aspetu hotu durante prosesu tranzisaun iha tinan ne’e, hafoin implementa iha 2021.

Tuir proposta dekretu-lei ne’ebe aprova iha Konsellu Ministru katak efetivamente EDTL sai Empreza Públika iha loron 1 janeiru 2021.

Tuir nia, importante mak Governu aprova ona estatutu EDTL sai hanesan Empreza Públika ho esperansa katak muda ona estatutu ne’e bele hamenus burokrasia no EDTL bele iha independénsia atu foti desizaun no halo atendimentu públiku ba avariasaun sira ho lalais no sustentável liútan.

“Nune’e ita nia konsumidór sira labele lamenta barak kona-ba ita-nia fornesimentu enerjia eletrisidade”, nia garante.

Molok muda estatutu, EDTL hanesan diresaun jerál ida ne’ebé tutela ba MOP, nune’e atendimentu EDTL nian tuir burokrasia iha ministériu sira, tanba ne’e bainhira muda ona ba Empreza Públika maka instituisaun ne’e iha ona autonomia fiananseira hodi halo atendimentu ho efetivu liután.

Nia refere liután, Konsellu Ministru aprova ona Dekretu-Lei rua mak hanesan, estabelese EDTL sai EP no ida fali harii Autoridade Nasionál Eletrisidade ne’ebé hanesan entidade reguladora iha setór eletrisidade ho intensaun katak atu halo atendimentu ne’ebé di’ak, kualidade no sustentável no la ho burokrasia.

“Ha’u hanoin ita bele eleva prestasaun servisu ho kualidade bainhira EDTL sai Empreza Públika. Nune’e, bele haree liu ba investimentu iha setór eletrisidade, prestasaun servisu no fornesimentu enerjia eletrisidade ba ita-nia povu sira”, nia afirma.

Autoridade Nasionál Eletrisidade ninia funsaun maka atu haree no asegura katak Empreza Públika no entidade privadu sira seluk ne’ebé mak hakarak investe iha setór eletrisidade, presta duni servisu ho kualidade no fó protesaun ba konsumidór sira.

“Bainhira ahi mate no konsumidór balun ninia sasán estraga, entidade reguladora eletrisidade maka sei haree tuir regulamentu ne’ebé iha hodi mellora liután no atu asegura katak EDTL no mós entidade sira seluk ne’ebé mak hakarak investe iha setór eletrisidade hanesan enerjia renovável,” Ministru esplika.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here