Ekipa IGE hahú survey Kondisaun Estrada Suku Muapitine-Lautem.imajen/Xefe Suku Lívio Mendes

DILI, 12 marsu 2020 (TATOLI) – Ministériu Obra Públika liuhosi Institutu Jestaun Ekipamentu (IGE, sigla Portugés), hahú survey ona kondisaun estrada iha Suku Muapitene, Postu Administrativu Lospalos, Munisípiu Lautém atubele aterru ho rai-mutin atu fasilita abitante sira asesu ba merkadoria no ba sentru saúde.

Xefe Suku Muapitine, Lívio Mendes informa ekipa enjeñeiru husi IGE MOP, hahú hala’o  survey ba kondisaun estrada ho kilometre 23 atubele atende situasaun emerjente hodi fasilita komunidade sira.

“Horisehik ami hamutuk ho ekipa IGE, observa ona kondisaun estrada hahú husi sidade Lospalos mai to’o Aldeia Malahara atubele aterru tanba kondisaun grave loos”, tenik Xefe Suku Muapitine liuhosi telefónika ba Agência Tatoli, kinta ne’e.

Hafoin finaliza survey, Autoridade Lokál ne’e dehan ekipa IGE deside iha tempu badak sei aterru estrada ne’ebé ho kondisaun grave liu hafoin halo planu no mapamentu.

“Sira haree hotu ona ami ninia kondisaun estrada no dehan fila ba Dili halo planu hotu mak foin kontaktu ami tanba sira dehan sei fó prioridade uluk lai ba estrada ne’ebé kondisaun grave liu ona”, nia akrenta.

Ho nune’e, Lívio Mendes ejize ba ekipa enjeñeiru IGE hodi toma atensaun emerjénsia hodi rezolve kondisaun estrada refere atu fasilita tansportasaun komunidade sira.

“Ami husu IGE, atu iha fulan-marsu ne’e tenke hahú aterru ona tanba iha maiu udan sei boot ne’e difikulta ona komunidade sira atu asesu ba merkadoria,” Lívio realsa.

Antes ne’e, abitante Suku Muapitine voluntariamente aterru estrada públiku husi diresaun Kapitál Lospalos ne’ebé ku’ak ba suku refere kuaze kilómetru 23.

Autoridade Lokál no komunidade ho inisiativa organiza malu iha Suku Muapitine tanba estrada kondisaun ladi’ak, kuandu tempu udan nakonu ho tahu dodok ne’ebé difikulta ekonomia inklui afeta komunidade asesu ba saúde.

Suku Muapitine tama iha área protejida Parke Nasionál Nino Konis Santana ne’ebé potensiál ba setór agrikultura, pekuária no turizmu komunitáriu no koñesidu ho fatin istóriku tanba besik liu foho Paicau ne’ebé líder rezisténsia luta libertasaun nasionál barak subar iha área ne’e.

Suku Muapitine kompostu husi aldeia lima ho totál populasaun 2.391 husi uma-kain 486.

Aldeia Malahara ho totál populasaun hamutuk 558, mane 269, feto 319 ho uma-kain 112, aldeia Vailoro ho populasaun na’in-499, mane 253 no feto 246 ho uma-kain 101, Aldeia Muapitine ho populasaun 443 kompostu husi mane 200, feto 243 ho uma-kain 96.

Aldeia Lopuloho iha uma-kakn 67 ho totál populasaun 351, mane 165 no feto 186 no Aldeia Pehefito ho populasaun 540, mane 279, feto 261 họ uma-kain 110.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here