Ministra Edukasaun, Juventude no Desportu, Dulce de Jesus Soares

DILI, 12 marsu 2020 (TATOLI)-Ekipa Konjunta kompostu hosi Komisaun Funsaun Públika (CFP-sigla portugés), Komisaun Anti Korrupsaun (CAC-sigla portugés) no Patrimóniu Estadu iha semana kotuk halo ona apreensaun ba karreta estadu hamutuk 13 hosi eis funsionáriu  Ministériu Edukasaun Juventude no Desportu (MEJD) tanba durante ne’e lakohi koopera hodi entrega  hikas patrimóniu estadu hirak ne’e ba governu.

Eis Funsionáriu na’in 12  servisu ona ho MEJD hahú kedas iha Governu Konstitusionál dahuluk to’o dahituk, maibé  iha fulan-janeiru 2017, ministériu la konsege estende sira-nia kontratu servisu.

Ministra Edukasaun Juventude no Desportu (MEJD), Dulce de Jesus Soares, hateten karreta hirak ne’e apoiu hosi Banku Mundiál  iha Governasaun UNTAET hodi tulun projetu banku ne’e nian, iha ne’ebé termina ona iha tinan 2013 liubá.

“Iha fulan-fevereiru 2018 ita haruka kedan karta notifikasaun ba pesoál sira ne’e maibé sira la intregra ho razaun oioin,”relata Ministra iha ninia servisu fatin Dili, kuarta (11/03/2020).

Governante ne’e apresia ho kontribuisaun hosi eis funsionáriu hirak ne’e hodi entrega filafali karreta 13 tanba ho kondisaun di’ak no la troka  xapa matríkula privadu.

“Ministériu kontente tebes tanba notifikasaun dala rua pesoál sira ne’e la kumpre maibé instituisaun kompotente ho medida ida justu konsege foti ona karreta husi pesoál sira ne’e,”tenik Dulce.

Ministra Edukasaun Juventude no Desportu (MEJD), Dulce de Jesus Soares, kongratula servisu hosi ekipa konjunta tanba konsege lori hikas patrimóniu estadu hirak ne’e ba governu.

Jornalista : Tomé Amado

Editór       : Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here