Diretor Nasionál Terras no Propriedades (DNTP), Francisco R. Borges Gutteres. Imajen/Domingos Piedade Freitas

DILI, 12 marsu 2020 (TATOLI)–Diretór Nasionál Terra no Propriedade (DNTP), Francisco Ribeiro Borges Guterres, hateten tempu badak sei hasai okupante sira ne’ebé daudaun ne’e okupa areadór Eskola Bázika Sentrál (EBC-sigla Portugés) Bidau-Akadiruhun, Munisípiu Dili.

Maibé, nia dehan, atu hasai komunidade uma-ka’in ualu ne’e presiza orsamentu operasionál. Tanba ne’e, Francisco husu ba Ministériu Edukasaun Juventude no Desportu (MEJD) atu apoiu osan operasionál hodi fasilita ekipa para ezekuta planu ne’e.

Notísia Relevante :Komunidade Dili Sei Kontinua Okupa Areadór Eskola Públiku

“Ita la prevee orsamentu despeza atu apoiu ekipa servisu sira ne’ebé atu transporta família uma-ka’in ualu iha EBC Bidau Akadiruhun. Maibé, karik Ministériu Edukasaun prepara orsamentu despeza ita bele realiza ona prosesu ne’e,” dehan Diretór Francisco ba Agência TATOLI, kinta (12/03/2020).

Orsamentu operasionál ne’e atu tulun ekipa atu tula okupante ba sira-nia hela fatin antes, hahán no seluk tan.

Notísia Relevante :Tribunál Notifika Ona Komunidade Okupa Aredór Eskola EBC Akadiruhun

“Okupante sira ne’e balun hela fora husi Kapitál Dili. Oinsá ita atu transporta kuandu osan despeza laiha, tanba ne’e ita hotu hein de’it kuandu osan iha ona mak ita sei hasai sira,” tenik tan.

Antes ne’e, Ministériu Justisa liuhosi DNTP fó ona nofikasaun dala ualu ba komunidade okupante iha EBC Akadiruhun tanba ne’e maka laiha razaun atu sira kontinua okupa fatin ne’ebá.

Hatán ba pedidu ne’e, Diretór Edukasaun Munisípiu Dili, Duarte Bragança, hateten nia parte oras ne’e enfrenta problema falta orsamentu  tanba  Governu funsiona de’it ho dotasaun orsamentu temporáriu (DOT) kada fulan.

Maibé, nia parte sei responde pedidu ne’e hafoin aprovasaun orsamentu jerál estadu (OJE) 2020.

Jornalista :Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here