Estrutura FDD dadalia ho jornalista sira hafoin hala'o enkontru ho Prezidente Repúblika, segunda lokraik ne'e. Imajen Ajénsia Tatoli/Xisto Freitas.

DILI, 12 marsu 2020 (TATOLI)—Eis Konselleiru Koligasaun Frente Dezenvolvimentu Demokrátiku (FDD) hosi Partidu Unidade Dezenvolvimentu Demokrátiku (PUDD), Agostinho Gomes hateten, koligasaun FDD ne’e disolvidu ona bazeia ba akordu partidu haat (4) nian inklui Partidu Dezenvolvimentu Nasionál (PDN).

“Koligasaun FDD laiha tiha ona, iha 17 juñu 2018. Ami haruka karta ida ba tribunál, ba CNE no ba mós Parlamentu Nasionál. Ami hato’o disolusaun FDD nian. Disolusaun ne’e bazeia ba partidu haat nia akordu. Ha’u rasik mak halo konferénsia imprensa. Iha momentu ne’ebá, ha’u dehan sé de’it labele lori FDD nia naran. Purtantu, apartir de 18 de juñu 2018 mai oin ne’e FDD laiha ona. Tanba ne’e mak ha’u la mosu ona reprezenta FDD, laiha ona reuniaun sira. Tanba ne’e mak partidu ida-idak iha nia bankada iha Parlamentu Nasionál,” dehan Agostinho Gomes ba jornalista sira iha nia hela-fatin, Fomento, kinta ne’e.

Nia hatutan, juridikamente FDD laiha ona tanba partidu haat ne’e haruka ona karta ba Tribunál Rekursu, ba CNE no Parlamentu Nasionál.

“Imi haree foin lalais ne’e partidu ida-idak halo nia konferénsia hanesan PUDD halo ninian, UDT halo ninian no Frenti-Mudança mós halo ninian, la’ós FDD mak halo nia konferénsia. Se señor Fernando Gusmão dehan sei eziste ne’e, nia bazeia mak saida. Ha’u hatene tanba ha’u mak líder aas liu iha FDD ne’e,” nia dehan.

Nia husu ba Prezidente PDN , Fernando Gusmão, lé artigu 78 akordu FDD nian disolve kuandu hetan konkordánsia entre partidu haat ne’e. Partidu haat ne’ebé asina konkordánsia disolusaun ne’e mak hanesan PUDD, UDT, FM no PUDD.

“PDN (Partidu Dezenvolvimentu Nasionál) mós asina hotu akordu konkordánsia ne’e. Depois asina ami haruka ba tribunál no tribunál tau tiha karimbu dehan Tribunál Rekursu simu ona maka ha’u foin halo konferénsia imprensa para fó hatene katak FDD ne’e disolvidu. Se dehan FDD ne’e sei eziste ne’e, la loos,” hateten Eis Konselleiru Másimu FDD ne’e.

Eis Konselleiru FDD ne’e fó-sai katak, osan subvensaun públiku la’ós reprezenta konta bankária FDD nian maibé reprezenta konta bankária partidu tolu ne’ebé hetan asentu iha Parlamentu Nasionál.

“Ne’e katak osan ne’e ba FM ba konta bankária FM nian, UDT ba UDT nian no PUDD ba konta PUDD nian, la’ós ba FDD. Se ba FDD ha’u tenke hatene tanba ha’u mak responsável másimu, halo nusá mak ha’u la hatene,” nia hateten.

“Ha’u seidauk hatene lei partidu polítiku mas tuir ha’u-nia haree ami fó de’it koñesimentu ba tribunal tanba ha’u la hatene sera que tribunál tenke rezeita. Ha’u hanoin laiha lójika tribunál atu rezeita. Tanba ne’e mak la presiza tribunál atu responde ami-nia karta. Ami fó hatene ba tribunál, ami fó hatene ba CNE no ami fó hatene ba Parlamentu Nasionál. Se dehan tenke hetan aseitasaun hosi tribunál, ha’u hanoin lei ne’e tenke hadi’a karik. Tanba ne’e ami-nia direitu,” nia hateten,

Eis Prezidente Komisaun Polítika Nasionál PUDD ne’e akresenta, iha momentu ne’ebá hato’o karta ba Tribunál Rekusu, CNE no Parlamentu Nasionál no karimbu hosi instituisaun tolu ne’e tau karimbu hodi rekoñese akordu disolusaun ne’e.

Entretantu, Deputada Bankada Parlamentár UDT-FM, Isabel Maria Barreto Freitas Ximenes, mós rekoñese koligasaun ne’e disolve ona.

“Buat hotu-hotu loos ona no disolve tiha ona. Tribunál hatene ona, ita la presiza dulas tán, loos hotu tiha ona,” nia dehan.

 Notísia RelevantePrezidente PDN Deklara Koligasaun FDD Sei Eziste

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here