Responsável AIFAESA hamutuk ho entidade relevante, halo konferénsia imprensa hodi fó sai rezultadu teste laboratóriu manu-tolun. Imajen Tatoli/Natalino Costa

DILI, 12 marsu 2020 (TATOLI)–Koordenadór Jerál Autoridade Inspesaun no Fiskalizasaun Atividade Ekonómika Sanitária no Alimentár, Institutu Públiku (AIFAESA,IP), Abílio Oliveira Serano, informa parte AIFAESA sei halo kontrolu másimu ba negosiante sira ne’ebé fa’an na’an iha dalan-ninin.

“Ami sei koordena ho Polísia Nasionál Timor-Leste (PNTL) atu haree, tanba bainhira fa’an na’an iha dalan-ninin ne’e tama ona ba iha órden públika. Tanba ne’e maka ami sei koordena ho entidade relevante atu haree ba kestaun ne’e”, dehan Abílio Oliveira liuhosi konferénsia imprensa ba rezultadu teste laboratóriu ba manu-tolun falsu, iha edifísiu AIFAESA, Matadouro, kinta ne’e.

Nia dehan, la’ós de’it atu halo kontrolu na’an sira iha dalan-ninin, maibé parte AIFAESA sei halo kontrolu ba roupa uzadu ne’ebé maka fa’an iha dalan-ninin.

“Tuir loloos sira tenke iha lisensa negósiu, se laiha lisensa negósiu maka labele halo atividade negósiu. Sira tenke tau iha konsiénsia”, nia akresenta.

Tuir Koordenadór Jerál, AIFAESA hamutuk ho Polísia tenke halo kotrolu tanba atividade sira-ne’e konsidera nu’udar perturbasaun ba órden públika ne’ebé proibidu fa’an sasán iha estrada.

“Maibé bainhira ita atu halo ida-ne’e, presiza halo koordenasaun didi’ak ho populasaun, tanba kualkér atividade negósiu ne’ebé de’it bainhira manán ona osan tenke iha lisensa”, nia realsa.

Tanba ne’e maka parte AIFAESA presiza haree didi’ak tanba kestaun ne’e liga ba negósiu populasaun nian ne’ebé buka moris.

“Hanesan fábrika tahu no tempe ne’ebé populasaun ki’ik sira halo produsaun, kuandu la ijiene ami haruka sira taka maski ami simu presaun husi sira”, Abílio salienta.

Nune’e mós, Xefe Departementu Laboratóriu Diagnóstiku Veterinária, Feliciano da Conceição, reforsa kona-ba fa’an na’an iha dalan ninin, iha polítika Governu atu kontrola tanba iha Ministériu Agrikultura Peska (MAP) ninia okos iha Diresaun Jerál Pekuária no Veterinária.

“Bainhira atu oho karau ida, tenke ba iha fatin hanesan Matadouro Nasionál iha Tibar hodi halo ezaminasaun ba kondisaun karau sira ne’ebé atu oho antes mortu no pós-mortu. Bainhira karau nia kondisaun ladi’ak, ami foti sampel tanba kestaun saúde públika ba konsumidór sira, maibé ita-nia negosiante karau sira maka la kumpre ida-ne’e”, Abílio lamenta.

Nia adianta, Governu tau ona regra maibé agora filafali ba populasaun sira, tanba fatin iha maibé dalaruma negosiante maka ladún koopera.

“Ita tau ona fatin no fasilidade, maibé ita-nia populasaun maka la kumpre la’ós falla iha implemetasaun”, nia akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here