Prezidente FFTL, Francisco Jerónimo. Imajen Mídia FFTL

DILI, 12 marsu 2020 (TATOLI)-Asian Football Confederation (AFC), iha kinta (12/03/2020) entrega sertifikadu baliza ba Treinadór Timoroan na’in sia ho nível I atu hahú fó formasaun ba jogadór sira iha área baliza.

Prezidente Federasaun Futeból Timor–Leste( FFTL), Francisco Gerónimo hateten, tuir loloos  treinadór hamutuk na’in 16 maka simu sertifikadu maibé na’in hitu la pasa iha prosesu formasaun  ne’ebé hala’o durante semana rua iha Dili.

“Formasaun ida ne’e sira na’in 9 de’it maka liu, sira ne’ebé mak seidauk liu sei fó tempu nafatin ba sira iha oportunidade tuir mai, sira ne’ebé liu ona foin primeiru iha ita-nia nasaun no sira iha direitu tomak atu fó treinamentu ba jogadór sira iha klube no selesaun nasionál,”dehan, Prezidente FFTL, ba Jornalista iha edifísiu FFTL Bairro Formosa Dili.

Iha fatin hanesan, Treinadór,  Agustinho Mesquita Martins hateten, formasaun ne’e hanesan oportunidade di’ak  hodi  aprende no ohin hakat tan pasu ida ba dezenvolvimentu kareira iha mundu desportiva.

“Ida ne’e hanesan oportunidade di’ak ida mai ami bele aumenta tan ami-nia lisensa hosi C ba B, durante ne’e ami aprende matéria defisil tebes ho ami-nia esforsu ohin loron konsege pasa. Ba oin ami sei fó treinamentu ba jogadór sira ho di’ak liután,”katak Agustinho Mesquita Martins.

Treiandór na’in sia ne’ebé hetan ona sertifikasaun hosi AFC maka Agustinho Mesquita Martins, Emilio da Silva, Lourenço da Costa, Vicente Ramos, Januario de Almeida, Salvador da Silva, Octávio Soares, Olisio Sarmento no Romão Guterres.

Jornalista: Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here