Prezidente Repúblika, Francisco Guterres Lú Olo, kuda ai-oan. Imajen/Xisto Freitas

DILI, 12 marsu 2020 (TATOLI)–Aban Prezidente Repúblika (PR), Francisco Guterres “Lú Olo”, hamutuk ho komunidade Metinaro dala ida tan sei kuda ai-parapa oan hamutuk 13.000 iha Metinaro hodi intensifika kampaña nasionál “Sidadaun Ida, Ai-Oan Ida”.

“Parte hosi kampaña ne’e maka ho kooperasaun Prezidénsia Repúblika, Programa Nasaun Unida ba Dezenvolvimentu (PNUD) no Konservasaun Internasionál Timor-Leste, iha sesta loron 13, fulan marsu, tinan 2020, iha tuku 09:00, Prezidente Repúblika hamutuk ho komunidade Metinaro-Dili, Beacou, Bobonaro no Ulmera, Liquiça dala ida tan sei kuda ai-parapa oan hamutuk 13.000,” dehan Prezidente Repúblika (PR), Francisco Guterres “Lú Olo”, liuhosi komunikadu imprensa ne’ebe Ajensia TATOLI asesu hosi Prezidénsia Repúblika, ohin.

Prezidente haktuir, iha loron 25 fulan Janeiru 2019, Prezidente Repúblika, Francisco Guterres Lú Olo, lansa kampaña nasionál “Sidadaun Ida, Ai-oan Ida”.

Kampaña nasionál “Sidadaun Ida, Ai-oan Ida” nu’udar parte hosi kompromísu polítiku husi Prezidente Lú OLo hodi promove meiu ambiente no dezenvolvimentu ida sustentável, ne’ebé fó sai iha serimónia tomada pose iha Tasi Tolu 20 Maiu 2020.

Hafoin lansamentu refere, Governu, Organizasaun Sosiedade Sívil, Ajénsia Internasionál, Igreja Katólika, Estudante no kuaze entidade tomak, simu no habelar kampaña ne’e ba teritóriu Timor-Leste tomak.

Daudaun ne’e, tuir PR Lú OLo haktuir, rejista ai-oan ne’ebé kuda ona iha teritóriu tomak hamutuk 624.873 no númeru ne’e sei aumenta iha tinan 2020 no tinan sira tuir mai ho partisipasaun timoroan tomak nian.

Kampaña ne’e la para, sei kontinua no kontinua nafatin hodi halo Timor-Leste sai furak no matak liután.

“Kuda ai-parapa nu’udar parte ida husi kampaña nasionál ‘Sidadaun Ida, ai-oan Ida”. Mai ita kontinua habelar inisiativa Prezidente Repúblika Francisco Guterres Lú Olo “Sidadaun Ida, Ai-oan Ida”. Kuda Ai-Oan Ida, Sei Proteje no Konserva Ita Rai no Natureza. Kuda Ai-Oan Ida, Nu’udar Investimentu ba ohin loron no Futuru,” nia dehan.

Kampaña ne’e, nia dehan, nu’udar inisiativa hosi Prezidente Repúblika maibé ho hanoin katak timoroan tomak sei hatutan ba beibeik nu’udar responsabilidade koletiva ida, atu salva Timor-Leste hosi udan sobu rai, atu TL bele hetan bee-moos ba beibeik no kaer-metin rai-bokur.

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here