Ministru Defeza, Filomeno da Paixão de Jesus. Imajen/António Gonçalves

DILI, 11 marsu 2020 (TATOLI)–Ministru Defeza no Ministru Interiór Interinu, Filomeno da Paixão de Jesus hateten, Prezidente Repúblika (PR), Francisco Guterres “Lu Olo”, husu ba Governu Timor-Leste liuliu Ministériu Defeza no Interiór atu tau konfiansa ba Tribunál Indonézia nian hodi deside kazu falsifikasaun osan.

“Prezidente Repúblika husu Timor-Leste tau-fiar ba Tribunál Indonézia nian atu deside kazu falsifikasaun osan ne’ebé envolve timoroan hanesan mós Tribunál Indonézia fiar Timor-Leste atu rezolve kazu ruma ne’ebé envolve sidadaun Indonézia ninian,” dehan Filomeno da Paxão de Jesus ba jornalista sira hafoin enkontru ho PR iha Palásiu Prezidente Nicolau Lobato, Bairru-Pité, Dili, kuarta ne’e.

Nia hatutan, situasaun agora daudaun iha segredu justisa nia laran no iha prosesu judisiál no ko’alia mós kona-ba sira ne’ebé halo fo’er líder sira-nia naran.

“Hanesan ha’u dehan ona iha Parlamentu Nasionál katak investigasaun atu hetan ema sira ne’ebé hatuun ita-nia veteranu sira-nia naran besik to’o ona rohan. Kona-ba sira-nia liafuan dehan kazu ne’e envolve ita-nia veteranu sira, ne’e lia-bosok. Tanba ita seidauk hatene prosesu ne’e ninia rohan. Ita ba kaer lia-bosok ida mai hatama fali lia-bosok ida iha mídia, aproveita situasaun nune’e bele estraga ita-nia líder sira-nia imajen,”  Paixão esplika.

Nia informa, Polísia Indonézia kaptura timoroan ho naran Bruno Magalhães nu’udár autór ba falsifikasaun osan. Parlamentu Nasionál mós bolu Ministru Filomeno Paixão hodi halo esplikasaun no medida ne’ebé foti tiha ona ba kazu refere no divulgasaun informasaun ne’ebé hafo’er líder no veteranu nia naran.

Maski to’o ohin loron ema seidauk hatama keixa kona-ba kazu falsifikasaun osan, maibé nia dehan, investigasaun ba divulgasaun informasaun ne’ebé la loos kontinua la’o.

Notísia Relevante: Investiga Kazu Osan Falsu, Ministru Filomeno Paixão Orienta PNTL Entrega Dokumentu Ba PSIK

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here