Ilustrasaun Violénsia Doméstika. Imajen/foti husi Google

DILI, 11 marsu 2020 (TATOLI) – Tribunál Distritál Dili (TDD), ohin, halo julgamentu ba arguidu MDF ne’ebé komete kazu violénsia doméstika (VD) hasoru lezada JME hanesan arguidu nia fen.

Tuir depoimentu Ministériu Públiku katak, iha loron 12 abríl 2019, tuku 16:00 Otl, iha arguidu ho lezada nia uma iha area Liquiça nian, arguidu fila ba uma hafoin halo atividade servisu Ojek, lezadu haruka arguidu atu ba kuru-bé, maibé arguidu lakohi tanba ne’e lezada komesa diskute malu ho arguidu.

Iha diskusaun ne’e, arguidu tuku dala ida iha lezada nia matan parte loos hodi rezulta moras no bubu hodi ba halo tratamentu iha Sentru Saúde Liquiça.

Liuhosi audiénsia julgamentu ne’e, Ministériu Públiku (MP) akuza arguidu ho prátika krime violénsia doméstika tuir artigu 3,35 alínea b hosi lei númeru 7/2010, ho forma ofensa integridade fízika simples tuir artigu 145 hosi kódigu penál Timor-Leste.

Arguidu MDF konsidera faktu sira ne’ebé fó sai hosi MP loos hotu, tanba momentu nervozu hodi tuku duni lezada.

Nia arrepende ho aktu ne’ebé halo no deklara ba Tribunál katak ba oin sei la halo tan hahalok sira ne’e hasoru lezada.

Ohin loron lezada ho arguidu moris hamutuk hanesan fen-la’en  hodi tau matan ba sira na’in rua nia-oan.

Iha sala julgamentu arguidu ho lezada mós deklara katak, maske akontese problema entre sira iha momentu ne’ebá dame malu no simu malu ona hanesan família no hanesan fen-la’en.

Hafoin rona tiha deklarasaun hosi arguidu no lezada nian, Ministériu Públiku no defeza haree ba sirkunstánsia sira ne’ebé iha husu ba tribunal atu aplika de’it pena multa ba arguidu tuir artigu 82 iha kódigu penál Timor-Leste. Ho nune’e, tribunal deside adia fila-fali julgamentu ba iha loron 24 marsu 2020 tuku: 17:00 Otl, hodi rona desizaun.

Audiénsia julgamentu ne’e prezide hosi juiz singular Albertina Neves, Ministériu Públiku reprezenta hosi Prokuradór Claudino Cardoso no Arguidu hetan asisténsia legal hosi Defensór Públiku Agostinha Oliveira.

Jornalista : Nelson de Sousa

Editór       : Francisco Simões

 

HAKEREK NO HATÁN

Please enter your comment!
Please enter your name here