Logo Expo Dubai 2020. Imajen/Espesiál

DILI, 11 marsu 2020 (TATOLI) Nasaun hamutuk 192 inklui Timor-Leste sei partisipa iha Espozisaun Dubai iha loron 20 outubru 2020 to’o 11 abríl 2021, ne’ebé sei realiza iha área kuaze ektare 438 iha Dubai Exhibition Centre.

Timor-Leste rasik tuir planu sei prevee orsamentu millaun $2 ba eventu mundiál ne’ebé sei realiza durante fulan-neen no halo ona preparasaun lubun hanesan selesaun ba grupu artezantu, kultura no produtu lokál.

Diretór Jerál Ministeriu Turismu, Komérsiu no Industria (MTKI), José Filipe Dias Quintas, informa Sekretariadu Espozisaun Dubai simu ona proposta Timor-Leste, kona-ba produtu ne’ebé maka atu aprezenta espozisaun mundiál 2020 ne’e.

Notísia Relevante: Governu Prevee Millaun $2 ba Expo Dubai

“Iha loron hirak liubá, ami simu ona informasaun husi Sekretariadu Espozisaun Dubai 2020 no sira konfirma katak simu ona ita-nian proposta ba produtu sira ne’ebé ita atu lori, hanesan kafé, mina nu’u virjem, bani been no produtu orgániku seluk tan”, tenik Diretór Jerál ne’e iha Sentru Konvensaun Dili (CCD-sigla portugés), kuarta ne’e.

Nia dehan, produtu sira ne’ebé maka atu lori husi Autoridade Espozisaun Dubai iha Timor-Leste no MTKI preparadu ona.

“Ami bazeia ba lista no halo ona koordenasaun ho ministériu relevante sira, por volta produtu sanulu maka sei lori ba Espozisaun Dubai“, nia akresenta.

Tuir Dirijente ne’e, kona-ba kontestu téniku-nian sei kontinua servisu nafatin.

“Ita-nian Sekretariadu Espozisaun Dubai 2020 hala’o ona ninia knaar hanesan bain-bain, tanba ne’e bainhira ita seidauk hetan orientasaun ka despaisu ruma husi Governu atu para, maka ita sei la’o nafatin”, nia dehan tan.

Hatan kona-ba orsamentu ba Espozisaun Dubai nian, José Filipe haktuir orsamentu ba eventu mundiál ne’ebé prevee iha Orsamentu Estadu sumba ona iha Parlamentu, maibé atu muda orsamentu ba Espozisaun Dubai maka sekretariadu iha Timor-Leste maka sei haree filafali.

“Iha ne’e mós iha estrutura Sekretariadu Espozisaun Dubai ninian, ne’ebé desizaun tomak iha sekretariadu maka sei hato’o proposta ba ita-nian Governu foun, karik mantein nafatin ho montante ne’ebé horibainhira prevee ona ka lae depende desizaun husi ita-nian sekretariadu”, nia salienta.

Maibé daudaun ne’e Timor-Leste preparadu ona ein termu tékniku ba Espozisaun Dubai no kontinua la’o nafatin.

“Ita preparadu atu tuir maka teknikamente ita preparadu ona no sekretariadu servisu hanesan bain-bain. Ita nia Sekretariadu Espozisaun Dubai  iha Timor-Leate koordena nafatin ho Sekretariadu iha Dubai 2020, liuliu ba rekezitu produtu sira-ne’ebé maka atu lori ba Espozisaun Dubai rasik hodi apresenta iha ita-nian paviliaun sira”, nia salienta.

Nia refere liután kona-ba moras Coronavírus, la fó impatu ba iha espozisaun ne’e tanba parte Sekretariadu Timór, koordena nafatin ho Sekretariadu iha Dubai katak laiha problema ba kestaun ne’e.

“Husi parte sira-nian seidauk foti desizaun katak Espozisaun Dubai 2020 sei hapara ka lae no ami mós seidauk hetan informasaun ida husi sira maibé to’o agora ita-nia Sekretariadu sei servisu nafatin”, nia dehan tan.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here