Diretór Diresaun Nasionál Organizasaun Urbana Ministériu Administrasaun Estatál, Hermínio Moniz Ribeiro. Imajen Tatoli/Julia Chatarina

DILI, 10 marsu 2020 (TATOLI)–Diretór Diresaun Nasionál Organizasaun Urbana (DNOU), Hermínio Moniz Ribeiro hateten, sanitáriu públiku iha Largo Lecidere provizóriu sei gratuita hela ba públiku tanba seidauk iha baze legáal ida atu rekolla reseita hosi  sanitáriu públiku.

“Governu hanoin hela atu buka mekanizmu oinsá mak bele uza sanitáriu públiku iha Jardín Largo Lecidere hodi kontribui reseita ba kofre estadu nian tanba agora daudaun ita seidauk iha baze legál ida hodi ita kobre,” dehan Diretór Diresaun Nasionál Organizasaun Urbana (DNOU), Hermínio Moniz Ribeiro, ba Ajénsia TATOLI liuhosi entrevista iha nia knaar fatin, Caicoli, Dili, tersa (10/3/2020).

Tanba ne’e, nia infroma, to’o agora Autoridade Munisípiu Dili seidauk bele implementa taxa ba sanitáriu públiku sira iha jardin. Maibé, tuir nia, bainbira iha ona dalan legál ruma hanoin sei aplika taxa ba utilizadór ka vizitante sira.

“To’o agora Autoridade Manisípiu Dili seidauk aplika taxa ba utilizadór sira tanba seidauk iha baze legál ida loloos ba sanitáriu públiku,” nia esplika.

Aleinde ne’e, nia informa, Governu mós hanoin atu harii tan sanitáriu públiku iha jardin balun ne’ebé mak ladauk tau, hanesan iha areia branka no mós iha jardín Bebora nian.

Nia dehan, atu implementa programa hirak-ne’e presiza mós suporta finanseiru hodi nune’e bele aselera no reforsa di’ak liután no ema hotu hatene katak osan laiha hodi halo serbisu.

Jornalista : Osória Marques

Editór        : Cancio Ximenes

HAKEREK NO HATÁN

Please enter your comment!
Please enter your name here