DILI, 11 marsu 2020 (TATOLI) – Embaixadór Timor-Leste (TL) ba Repúblika Indonézia, Alberto X.P. Carlos, husu ba timoroan hotu ne’ebé hela namkari (rezidi) iha territóriu Repúblika Indonézia atu labele pániku ba epidemia Coronavirus (COVID-19) ne’ebé afeta ona ba Indonézia no hada’et lalais tebes hosi ema bá ema.
Liuhosi karta avizu ne’ebé Embaixada TL iha Jakarta hasai, ohin, bolu atensaun ba timoroan hotu iha Indonézia katak, “saúde iha ita-nia liman rasik” nune’e embaixada husu;
- Halo orasaun /reza no la bele pániku ho situasaun ne’e.
- Fase liman ho sabaun ou uza anti-séptika frekuentamente.
- Hasees-an hosi animál fuik no la bele konsome na’an sira ne’ebé te’in seidauk tasak didi’ak.
- Hadook-an hosi ema-sira ne’ebé hetan ona síntoma ou sira ne’ebé hetan ona moras hanesan inus-metin, me’ar no isin-manas.
- Lalais ba ospitál ka hasoru médiku sira bainhira sente síntoma hanesan inus-been (fani), me’ar, isin-manas, dada-iis arraska ka kolen demais.
- Konsome ai-han ne’ebé bele aumenta vitamina no sistema-imunidade.
- Uza maskra antes atu sai bá fatin públiku sira.
Liuhosi karta ne’ebé Embaixadór Alberto X.P. Carlos, haruka mai Agência Tatoli ne’e mós husu ba timoroan sira iha territóriu Indonézia atu iha situasaun emerjénsia ruma bele kontaktu Embaixada Timor-Leste iha Jakarta.
Hosi sorin seluk, Prezidente Repúblika Indonézia, Joko Widodo (Jokowi) halo mós alerta ida ba nia sidadaun hotu atu kontinua atensaun “matan moris no neon na’in” enfrenta epidemia Coronavirus.
Liuhosi publikasaun Liputan6.com edisaun tersa, 28 janeiru 2020, ne’ebé sita-tuir YouTube Sekretariadu Prezidente Repúblika Indonézia nian, Joko Widodo, bolu atensaun ba nia emar-sira atensaun nafatin ba Coronavirus.
Estadu Indonézia monta seguransa ho ekipamentu no kontinua halo vijilánsia iha portu no aeroportu ne’ebé sai hanesan portaun-boot ba ema tama-sai territóriu Indonézia.
Jornalista : Eugénio Pereira
Editór : Francisco Simões
