DILI, 11 marsu 2020 (TATOLI)–Polísia Nasionál Timor-Leste (PNTL) liuhusi Unidade Polísia Tránzitu hamutuk ho Task Force bandu ona funsionáriu sira ne’ebé maka hala’o knaar iha Palásiu Governu atu labele para motór no karreta iha arredór Palásiu nian, nune’e bele fó espasu ba komunidade la’o-ain sira.
Entidade hirak-ne’e realiza órden bazeia ba despaixu husi Governu no atu implementa Lei Kódigu Estrada.
“Ami kumpre despaixu hosi Governu ba ami-ninia instituisaun rua hanesan PNTL no FALINTIL-Forsa Defeza Timor-Leste (F-FDTL), nune’e ami-ninia komando Munisípiu Dili atu implementa Lei Kódigu Estrada ba populasaun sira ne’ebé durante ne’e seidauk komprende kódigu ne’e”, hateten Komandante Tránzitu Munisípiu Dili, Inspetór Domingos Sarmento Gama iha Praça de Proclamação da Independéncia, Palásiu Governu, kuarta ne’e.
Tuir nia, Lei kódigu Estrada artigu 49 alínea g no artigu 93 hateten katak, motór no karreta sira ne’ebé komunidade sira uza labele para fali iha trotoár leten, tanba trotoár ne’e atu fó espasu ba komunidade la’o-ain.
“Maibé realidade komunidade balun para motorizada iha la’o-ain ninia fatin, no la’o-ain sira la’o fali iha estrada ninin no barak maka hetan dezastre”, nia akresenta.
Inspetór Domingos Sarmento refere liután, iha kuarta ne’e Polísia fó toleránsia ba funsionáriu ne’ebé hala’o knaar iha Palásiu Governu, hodi bele muda sees motór no karreta ne’ebé para iha trotoár, maibé hahú aban maka nafatin para iha fatin refere maka Polísia Tránzitu sei foti motorizada sira hodi ba tau iha Kuartel Jerál PNTL, Caicoli.
Nia subliña, antes ne’e halo ona sosializasaun ba komunidade hotu, liuliu ba estudante sira kona-ba Lei Kódigu Estrada ninian hodi nune’e bele komprende didi’ak kontiúdu lei.
Tuir observasaun Agência Tatoli katak Polísia Tránzitu sira mai aviza ba funsionáriu sira ne’ebé ninia motorizada para iha trotoár Palásiu Governu nian, hodi bele para iha fatin seluk, nune’e funsionáriu sira halai sai husi edifísiu hodi ida-idak ba foti ninia motorizada.
Jornalista: Antónia Gusmão
Editora: Julia Chatarina
