DILI, 11 marsu 2020 (TATOLI)–Komandu Polísia Munisípiu Dili, ohin, kaptura suspeitu kazu violasaun seksuál ho inisiál APD iha nia servisu fatin, Ministériu Turizmu, Komérsiu no Indústria (MTC-sigla portugés).
PNTL halo kapturasaun ne’e bazeia ba keixa ne’ebé hato’o hosi vítima MDSG, tersa (09/03/2020), katak, suspeitu APD bosok nia lori ba área mota-laran, Suku Lahane Osidentál, Postu Administrativu Nain Feto, Munisípiu Dili, hodi ameasa no halo agresaun fízika hodi obriga halo relasaun seksuál.
Kazu violasaun seksuál ne’e akontese purvolta tuku 14:00 Otl, iha-ne’ebé suspeita kondús motorizada ho Xapa Matrikula 5846 G tula vítima hosi nia servisu fatin iha Dili laran atu han meudia. Maibé, liu iha dalan suspeitu lori fali vítima ba área foho-lolon Lahane Osidentál hodi halo agresaun fíziku no hadau vítima nia telefone ho ameasa no obriga halo violasaun seksuál hasoru vítima.
Kazu ne’e rasik rejista ho númeru NUK 0068/20/DIDIL no daudaun ne’e PNTL asegura hela vítima iha fatin hakmatek Unidade Polísia Vulnerável (UPV) Caicoli, Dili, hodi bolu família vítima presta submete ba Ministériu Públiku.
Ho tanis, vítima MDSG haktuir ba jornalista iha Komandu Polísia Caicoli Dili katak, nia parte hato’o keixa ne’e ba PNTL tanba lamenta asaun violasaun seksuál obriga no ameasa hodi tenta oho nia.
Vítima rasik husu ba Unidade Polísia Vulnerável (UPV) atu prosesa kazu ne’e ba tribunál. Tanba nia vida sente la seguru ho ameasa sira hosi suspeitu.
Parte seluk, família vítima ne’ebé akompaña kazu ne’e husu mós ba Organizasaun Naun Governamentál ALFELA hodi fó protesaun ba vítima.
Suspeitu APD detein hela iha sela Polísia Munisípiu Dili durante oras 72 hafoin submete ba Primeiru Interrogatóriu iha Tribunál Distritál Dili (TDD).
Jornalista : Eugénio Pereira
Editór : Francisco Simões
