Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur.

DILI, 11 marsu 2020 (TATOLI)–Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timur, husu ba Parlamentu Nasionál (PN) atu halo lalais lei ida urjente [Cyber Crimered] hodi kriminaliza sidadaun sira ne’ebé uza identidade falsa hodi tarata líder nasionál sira iha mídia sosiál.

Se Parlamentu Nasaionál la halo lalais lei refere, Lere Anan Timur hateten, Forsa mak sei foti medida hodi kaer ema hirak ne’ebé uza identidade falsa sira hodi tarata líder sira ne’e hafoin entrega ba justisa.

“Ita haree ba krime ne’ebé mosu iha facebook ne’ebé ema tarata ita-nia líder sira, até órgaun soberania sira no líder nasionál sira. Ha’u husu Parlamentu Nasionál atu halo lalais lei ida hodi kondena ema sira ne’ebé tarata ita-nia líder sira no proteje ita-nia órgaun soberania sira. Tanba liberdade no direitu ne’e ema hotu tenke respeita. Ema ida labele viola,” dehan Lere Anan Timur hafoin hala’o enkontru semanál ho Prezidente Repúblika iha Palásiu Prezidente Nicolau Lobato, Bairru Pité, Dili, ohin.

Maibé, nia hatutan, ikus-ikus ne’e nia haree facebook, maske nia la hatene loke maibé haruka ema seluk loke no hatudu ba nia lee ne’e, ema tarata Prezidente Repúblika, tarata líder nasionál sira, tanba Timor-Leste nia lei laiha.

“Ha’u repete tan. Parlamentu halo lalais lei atu proteje ita-nia órgaun soberania sira ka ami [forsa] toma inisiativa hodi kaer no entrega ba tribunál atu julga. Tanba ita funu to’o ukun-an atu respeita malu. Maski demokrasia maibé tenke respeita malu, ne’e mak importante,” nia hateten.

Lere hatutan, ko’alia kona-ba patriotizmu, nasionalizmu, signifika tenke respeita órgaun soberania sira, respeita ba símbolu nasionál sira hanesan Prezidente Repúblika nu’udár símbolu no xefe nasaun nian. Tanba ne’e, nia repete, Parlamentu Nasionál tenke halo lei ida no lei ne’e tenke iha duni.

Jenerál ne’e afirma, tenke halo hanesan ne’e tanba la’ós dehan katak Timor-Leste ne’e uza demokrasia, liberdade no ida-idak halo tuir nia hakarak ne’e, Timor ne’e atu lori bá ne’ebé.

“Timor nasaun ki’ik ida. Populasaun ne’ebé millaun ida resin de’it. Nusa mak ita la konsege no labele kontrola ita-nia ema sira-ne’e atu sai sidadaun di’ak, iha nasionalizmu no patriotizmu,” Lere subliña.

Antes ne’e, peskizadór information security Abrão Ximenes hateten, Timor-Leste presiza duni atu halo lei kona-ba Cyber Crime, nune’e bele regula krime sira ne’ebé iha relasaun ho teknolojia inklui utilizasaun facebook.

Aleinde ne’e, antes ne’e mós, Prezidente Komité 12 Novembru, Gregório Saldanha husu atu parte kompetente iha Timor-Leste halo lei hodi regula rede sosiál tanba ikus-ikus ne’e ema uza facebook lahó étika.

Notísia Relevante: MOPTK Sujere ANC Prepara Lei Cyber Crime

Jornalista : Cipriano Colo

Editór       : Cancio Ximenes

1 KOMENTÁRIU

  1. 100% konkorda ho pedidu Avo Lere nia liafuan neeee, hodi husu ba PN atu kria lalais lei ida ho karater urgente, tanba ema sira ne’ebe mak tarata Lider Historiku sira iha Media Sosial neeee

HAKEREK NO HATÁN

Please enter your comment!
Please enter your name here