Cristo Rei. Imajen/Turizmu Timor-Leste

DILI, 11 marsu 2020 (TATOLI) – Ministériu Turizmu, Komérsiu no Industria (MTKI) liuhosi Diresaun Jerál Turizmu (DJT), hamutuk ho liña ministeriál hotu, konvoka diskusaun ho setór privadu hotu kona-ba Planu Estratéjiku Nasionál Timor-Leste ba tinan 2030 (PENT) “Turizmu ba Ema Hotu”.

Objetivu hosi konvokatóriu ne’e, atu deskute hamutuk entre setór privadu ho setór públiku (Governu), ne’ebé kompostu hosi liña ministeriál hotu, kona-ba oinsá hetan solusaun ne’ebé adekuadu antes halo aprezentasaun iha Konselu Ministru, kona-ba implementasaun planu politíka turizmu iha futuru ho di’ak no adekuadu.

Iha oportunidade ne’e, Asesór Prinsipál MTKI, Jacinto Regoberto, observa durante ne’e ema hotu iha nasaun barak ninia orientasaun halai liu ba setór turizmu.

“Tanba ne’e, liuhosi konvokatóriu ne’e atu haree hamutuk modelu saida maka sei uza hodi dezenvolve setór turizmu iha Timor-Leste”, tenik Jacinto Rigoberto iha Sentru Konvensaun Dili (CCD, sigla portugés), kuarta ne’e.

Tuir asesór ne’e, setór turizmu loloos sai ona hanesan nasaun ninia rendimentu prinsipál.

“Ezemplu iha ema nia-nasaun dezenvolvidu, sira prioridade liu ba setór turizmu tanba bele iha rendimentu no hasa’e reseita boot ba Kofre Estadu”, nia akresenta.

Nia realsa, maski Timor-Leste hanesan nasaun foun ida no kiik, maibé ho pontensialidade turizmu ne’ebé iha presiza dezenvolve di’ak liután iha futuru.

Iha sorin seluk, Diretór Jerál MTKI, José Filipe Dias Quintas, reforsa iha fórum diskusaun ne’e katak presiza koordenasaun entre ministériu relevante ho setór privadu sira hodi bele haree no dezenvolve di’ak planu estratéjiku sira ne’ebé maka ministériu turizmu rasik trasa ona.

“Ema hotu hatene, nasaun Timor-Leste maski nasaun kiik maibé tenke rekoñese katak iha sítiu turíztiku barak. Tanba ne’e maka presiza iha diskusaun hodi tau hanoin hamutuk oinsá atu implementa programa iha futuru mai”, nia subliña.

Dirijente refere liután, planu estratéjiku ministériu turizmu-nian iha lima, ne’ebé sai pilár importante hanesan prioridade, prospriedade, protesaun, parseria, no povu.

“Koordenasaun ne’e save importante ba ita hotu, tanba daudaun ne’e iha planu prioriade lima ne’ebé sai ona pilár importante. Tanba ne’e, ami iha ideia oinsá ita tenke tuur hamutuk hodi rona setór privadu sira nia hanoin, nune’e iha futuru bele dezenvolve turizmu sai di’ak no kualidade ba ita hotu”, José Filipe dehan tan.

Iha okaziaun ne’e, reprezentante setór privadu, ne’ebé hanesan Vise-Prezidente Kámara Komérsiu no Industria Timor-Leste (CCI-TL,sigla portugés) ne’ebé trata Asuntu Infraestrutura, João Fernandes Alves, observa planu ne’ebé ministériu prepara di’ak tebes, maibé setór privadu sei iha preokupasaun kona-ba fasilidade kréditu.

“Atu dezenvolve setór turizmu hanesan dezenvolvimentu importante, tenke iha finanseiru ne’ebé metin. Setór privadu hakarak koopera nafatin hamutuk hodi lori planu ne’e ba oin. Importante maka benefísiu ba povu no nasaun ne’e ninia rendimentu ekonomia la’o ho di’ak”, nia salienta.

Jornalista: Natalino Costa

Editora: Juli Chatarina

HAKEREK NO HATÁN

Please enter your comment!
Please enter your name here