Pontu vokal ekipa konjunta Patrimoniu Estadu, Cipriano do Rosario Pereira. Imajen/Eugénio Pereira

DILI, 11 marsu 2020 (TATOLI)–Ministériu Finansas liuhosi Diresaun Nasionál Patrimóniu Estadu (DNPE) preokupa ho liña ministeriál boot balun durante ne’e ladún koopera atu entrega sira-nia relatóriu trimestrál ba kona-ba gastu kombustível ba karreta no motór Estadu nian.

Notísia Relevante : Ekipa Konjunta Halo Apreensaun Ba Karreta Sia Hosi ME

Pontu Vokál Ekipa Konjunta husi Patrimóniu Estadu, Cipriano do Rosário Pereira dehan, tuir loloos liña ministeriál sira tenke entrega sira-nia relatóriu gastu kombustível no relatóriu manutensaun hodi patrimóniu Estadu bele halo kontrolu no poupa gastu osan Estadu nian.

“Ami mós ba haree liña ministeriál sira nia sistema uza kombustivel ne’e tuir loloos sira aprezenta kada fulan tolu mai Patrimóniu Estadu, maibé liña ministeriál balun sira la halo relatóriu gastu ba kombustível no manutensaun nian, entaun ekipa deside sei halo kontrolu para haree ninia problema saida para ita solusiona problema sira-ne’e,” hateten Cipriano do Rosário Pereira ba jornalista, ohin, iha edifísiu Diresaun Nasionál Patrimóniu Estadu, Balide, Dili.

Nia dehan, ekipa Diresaun Nasionál Transporte no Terrestre (DNTT), Diresaun Nasional Patrimóniu Estadu (DNPE), Komisaun Antí Korrupsaun (CAC-sigla portugés) ho Komandu Polísia Nasionál Timor-Leste (PNTL), rasik hasai ona regra ida hodi fahe ba liña ministeriál sira hodi prenxe sira-nia relatóriu gastu kombustível, maibé to’o agora só úniku liña ministeriál ki’ik balun maka koopera no aprezenta relatóriu trimestrál kompletu.

Ekipa konjunta rasik identifika problema iha liña ministeriál balun  nia karreta Estadu aat para de’it iha uma privadu, maibé kada fulan osan gastu ba kombustível kontinua ativu.

Ho problema ne’e, ekipa konjunta nota katak, liña ministeriál sira presiza aplika sistema kontrolu uza kombustível ho naran Trip Ticket nu’udar sistema ida di’ak para halo fásil liña ministeriál sira atu halo poupansa karreta Estadu ida uza mina kada loron to’o fulan tenke gastu tuir alvu hodi evita gastu arbiru ba atividade privada.

Mekanizmu Trip Ticket mós kontrola karreta Estadu ida atu enxe mina tenke kompleta ho xapa matríkula, modelu karreta, inklui sé maka lori karreta no karreta perténsia ba liña ministeriál ka instituisaun Estadu ne’ebé presiza prenxe iha sistema laran.

Ekipa mós sei halo kontrolu ba karreta Estadu ne’ebé oknum funsionáriu sira uza ba atividade privada ka atividade servisu maka hasoru asidente tráfegu tenke halo relatóriu hodi evita atu kualkér funsionáriu ida bainhira hasoru asidente iha atividade privadu labele halo fali relatóriu falsu hodi Estadu maka hasai fali osan halo manutensaun karreta ka motór.

Iha semana ne’e, ekipa Komandu Polísia Nasionál Timor-Leste (PNTL), Diresaun Nasionál Transporte no Terrestre (DNTT), Patrimóniu Estadu no Komisaun Antí Korrupsaun (CAC) rasik kontinua rekolla karreta Estadu iha liña ministeriál sira ne’ebé ekipa identifika ona.

2019, Rejista Kazu Liu 20

Durante marsu to’o dezembru 2019, ekipa konjunta prosesa mós kazu liu 20 ba Ministériu Públiku hafoin halo inspesaun surpreza no asaun represivu ba Funsionáriu Públiku ne’ebé utiliza karreta no motorizada Estadu (Xapa G) kontra bandu no la tuir regra.

Ekipa konjunta sei kontinua halo operasaun hodi kontrola nafatin funsionáriu públiku sira atu uza karreta no motór Estadu tenke kuidadu hodi labele estraga patrimóniu Estadu.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here