Bebé foin moris. Ilustrasaun

DILI, 11 marsu 2020 (TATOLI)-Tuir relatóriu hosi Ospitál Nasionál Guído Valadares Dili (HNGV-sigla portugés) relata durante fulan-janeiru to’o fevereiru 2020, konsege fó partus ba inan isin-rua hamutuk 938 iha sala maternidade.

Xefe Gabinete Kontrolu Kualidade HNGV, Sara Maria Xavier, informa hosi total númeru inan isin-rua ne’ebé maka partus, 643 partus ho kondisaun normal, 149 partu ho kondisaun cesariana no 56 maka partu ho ventoza ka partu instrumental.

”Totál inan sira ne’ebé mak admitida mai iha maternidade na’in tolu mak mate iha fulan-janeiru sira mate tanba kauza husi komplikasaun hanesan hipertensaun durante grávidez ka preklansia  no mós mate tanba hemorasia post partum,” dehan, Sara Maria Xavier, ba Jornalista sira iha HNGV, ohin.

Nia hateten durante fulan rua ne’e, bebe na’in 16 maka mate, bainhira parteira sira atu fó partus tanba bebe mate ona iha inan-nia kabun bainhira família lori ba Ospitál.

”No bebé ne’ebé mak moris mai  depois loron 28  nia laran mak mate ne’e hamutuk 17 ne’e kauza husi bebé dada is la ho normal, infesaun,  no kazu sira seluk ne’ebé mak kauza ba bebé sira mate,”tenik tan.

Sara Maria Xavier, rekomenda ba inan isin-rua sira atu halo ezersisu ka movimentu barak bainhira tama ona iha fulan ikus atu partus hodi nune’e bele tulun sira atu partus ho kondisaun normal.

“Inan isin-rua tenke badinas kontrola minimu dala haat maibé  se bele di’ak liu fulan-fulan atu nune’e bele hetan tratamentu ne’ebé mak di’ak husi ita-nia pesoál saúde sira hanesan médiku no parteira sira,”nia rekomenda tan.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here