Primeiru-Ministru, Taur Matan Ruak, prezide reuniaun Konsellu Ministru iha Palásiu Governu, kuarta (11/03). Imajen Tatoli/Egas Cristovão

DILI, 11 marsu 2020 (TATOLI)–Governu liuhosi reuniaun Konsellu Ministru, aprova Projetu Rezolusaun Governu ne’ebé aprezenta husi Ministru Negósiu Estranjeiru no Koperasaun, Dionísio da Costa Babo Soares, estende aplikasaun no ezekusaun medida temporária, hodi halo interdisaun no restrisaun ba ema estranjeiru sira ne’ebé atu tama mai rai-laran.

Ministru Estadu Prezidénsia Konsellu Ministru, Hermenegildo Augusto Cabral Pereira, esplika Rezolusun Governu ne’e vale liu ba sidadaun sira tama mai rai-laran iha semana haat tuirmai ka halo tránzitu ba nasaun hanesan Repúblika Populár Xina, Repúblika Koreia, Repúblika Italiana, no Repúblika Izlámika Iraun.

“Governu konsidera katak propagasaun ba Coronavirus la’o lais tebes, nune’e medida kona-ba interdisaun ne’ebé define iha termu rezolusaun ida-ne’e, sei represia filafali hafoin haree ba ninia manutensaun ka eliminasaun”, tenik Ministru Hermenegildo, hafoin reuniaun ezekutiva sira iha Praça de Proclamação da Independéncia, Palásiu Governu, Dili, kuarta ne’e.

Notísia Relevante: Governu Hola Medida Temporária Hodi Regula Sidadaun Estranjeiru Husi Xina

Governante ne’e afirma, liuhusi desizaun Governu ida-ne’e sei fó órden ba Ministériu Saúde hodi koordena ho liña ministeriál relavante sira, hodi atua ba protokolu ne’ebé estabelese ona hosi Organizasaun Mundiál Saúde (OMS).

Diresaun Jerál Prestasaun Saúde (DGPS) husi Ministériu Saúde akompaña situasaun epidemolojia liuhosi orientasaun téknika OMS nian no servisu hamutuk ho kolaborasaun di’ak ho Laboratóriu Nasionál Saúde, Hospital Nacional Guido Valadares, autoridade responsável sira ba kontrolu no jestaun ba postu entrada no mós estrutura seluk hodi fó apoiu kona-ba jestaun medida prevensaun no kontrolu iha Timor-Leste.

Iha biban ne’e, Ministra Saúde Ein-ezersísiu, Élia António de Araújo dos Reis Amaral atualiza atividade hirak ne’ebé realiza ona, hahú iha janeiru no planu kontijénsia ne’ebé define nível resposta no asaun hodi minimiza risku transmisaun hosi Coronavirus (COVID-19) iha Timor-Leste.

Governante ne’e mós aprezenta pontu situasaun kona-ba preparasaun fatin tolu ba izolamentu, kuarentena no tratamentu protokolu hodi haruka amostra hosi pasiente sira ne’ebé suspeita ona COVID-19 ba Austrália no protokolu kona-ba intervensaun médika ne’ebé sei realiza bainhira hetan kazu pozitivu ruma.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here