Xefe Estado Maiór Jenerál F-FDTL, Majór Jenerál Lere Anan Timur. Imajen/Antonio Goncalves

DILI, 11 marsu 2020 (TATOLI)–Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timur, ohin, informa ba Prezidente Repúblika katak instituisaun F-FDTL koloka ona pelotaun tolu iha postu seguransa sira iha fronteira.

Postu seguransa hirak-ne’e,  nia informa, mak postu seguransa Tilomar-Suai, Tunubibi-Bobonaro no Manduki-Bobonaro. Kolokasaun ne’e, ho intensaun atu bele apoiu seguransa iha fronteira rai-maran nian hodi kontrola krime organizadu sira inklui Coronavirus. 

“Ha’u informa mós ba Prezidente Repúblika katak ami reforsa ona seguransa fronteira ninian. Uluk ita dehan katak ita koloka seguransa iha fronteira ne’e seksaun ida-ida maibé agora ita tau pelotaun ida-ida. Pelotaun ida iha Tilomar, ida iha Tunubibi no ida iha Manduki. Sira-ne’e atu kontrola krime organizadu no Coronavirus tanba bele tama mai husi fronteira rai-maran,” dehan Lere Anan Timur ba jornalista sira hafoin hala’o enkontru semanál ho PR Lú Olo, iha Palásiu Prezidente Nicolau Lobato, Bairru-Pite, Dili, ohin.

Lere informa, forsa agora reforsa ona seguransa iha fronteira iha ona terrenu. Maibé, tuir nia, kestaun agora mak fasilidade ka meiu liuliu transporte atu nune’e forsa sira bele kumpre di’ak sira-nia misaun hodi halo patrullamentu.

“Atu prevene krime organizadu tanba ohin loron krime organizadu ne’e, kuaze Timor nu’udar nasaun ida-ne’ebé mak foin ukun an, Timor ida-ne’ebé mak laiha meiu atu rezolve. Entaun, ema bele aproveita. Ha’u bele dehan katak, forsa sira iha ona terrenu maibé ita-nia efetivu ne’e ita hatene,” nia esplika.

Tanba, nia hatutan, rekrutamentu ba kandidatura F-FDTL foun sira iha tinan ida-ne’e tanba de’it impase polítika entaun tenke adia fali ba 2021. Tanba ne’e, sira koloka tuir posibilidade ne’ebé mak Timor-Leste iha.

“Tanba, ita-nia forsa sira iha Hera, Ataúro, Oé-Cusse, Kuartél, seguransa ba Prezidente Repúblika, sira-ne’e hotu ita fahe kuaze 2000 resin, ne’e la to’o,” nia hateten.

Entretantu, nia haktuir, oras ne’e daudaun membru F-FDTL husi Unidade Polísia Militár ne’ebé destakadu iha postu seguransa tolu hanesan fronteira Tunubibi, Tilomar no Manduki nian kuaze ema na’in atus-ida.

Notísia Relevante: Tempu Badak F-FDTL Sei Reforsa Seguransa Postu Fronteira Tunubibi

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here