Karreta Prado Parlamentu Nasionál. Imajen/Espesiál

DILI, 11 marsu 2020 (TATOLI)—Sekretária Meza Parlamentu Nasionál, Cedelizia Faria dos Santos informa, daudaun ne’e Parlamentu Nasionál (PN) kontinua hein desizaun hosi Ministériu Públiku (MP) kona-ba eis-deputadu na’in-12 mak to’o oras ne’e seidauk entrega karreta Prado ne’ebé uluk sira utiliza.

“To’o agora ami seidauk simu notifikasaun ruma hosi Ministériu Públiku. Ita hein de’it. Tanba, deputadu sira ema-na’in 18 sira re-eleitu, entaun sira-ne’e la simu karreta foun  no sira uza nafatin karreta sira-ne’ebé mak tuan. Só eis-deputadu na’in-12 de’it mak seidauk entrega karreta Prado ne’ebé uluk sira utiliza,” Sekretária Meza Parlamentu Nasionál, Cedelizia Faria dos Santos, informa ba jornalista sira iha Parlamentu Nasionál, ohin.

Nia dehan, Parlamentu Nasionál hein de’it desizaun hosi Ministériu Públiku tanba kazu ne’e hatama kleur ona. Tanba, nia dehan, karreta Prado hamutuk 12 oras ne’e sei iha eis-deputadu balun nia liman.

“Karreta ne’e sosa iha iha III Lejizlatura ho marka Prado ho folin $63.000 kada unidade. Hafoin termina mandatu iha IV Lejizlatura nian maibé deputadu balun seidauk no la entrega karreta sira-ne’e,” nia hateten.

Jornalista : Evaristo Soares Martins

Editór        : Cancio Ximenes