Sekretária Jerál Parlamentu Nasionál, Cedelizia Faria dos Santos. Imajen Mídia UNESCO.

DILI, 11 marsu 2020 (TATOLI)—Sekretária Jerál Parlamentu Nasionál, Cedelizia Faria dos Santos informa, ezekusaun Dotasaun Orsamentál Temporáriu (DOT) hosi Parlamentu Nasionál fulan-fevereiru nian atinje %61.

“To’o loron 28 fevereiru hosi Parlamentu Nasionál inklui obrigasaun ita gasta ona %61. Persentajen boot liu mak iha halo transferénsia públika. Orsamentu ida-ne’e ita halo transferénsia ba bankada sira, tuirmai mak saláriu no vensimentu, tanba ita hotu hatene ema hotu serbisu ita halo transferénsia, persentajen tuirmai mak bens no serbisu nian,” dehan Sekretária Jerál Parlamentu Nasionál, Cedelizia Faria dos Santos, liuhosi konferénsia imprensa ne’ebé hala’o iha sekretriadu PN, kuarta ne’e.

Maski nune’e, Cedelizia dehan, Parlamentu mós hetan osan iha kapitál dezenvolvimentu maibé montante ne’e ki’ik-oan tebes  difísil atu halo reabilitasaun ba fatin serbisu sira.

“Hosi orsamentu ne’e, ami hetan difikuldade iha ezekusaun tanba kada komisaun halo fiskalizasaun iha munisípiu kadaves fulan ida sira halo iha munisípiu rua no tolu. Maibé, Dotasaun Orsamentál Temporáriu ne’e ho montante ki’ik-oan tebes. Eentaun, fulan-ida komisaun só bele halo fiskalizasaun ba munisípiu ida-de’it no orsamentu mós ramata, ne’e mak difikuldade ida Parlamentu hasoru,” nia dehan.

Nia haktuir, hosi totál orsamentu millaun $1,241,928 ne’ebé Ministériu Finansa (MF) prevee ba Parlamentu Nasionál (PN) iha fulan-fevereiru hamutuk $1,241,928 ne’e kompostu hosi saláriu no vensimentu $484,484, bens no serbisu $662,527, transferénsia públika $78,667 no kapitál dezenvolvimentu $16,250.

Nia hateten, hosi orsamentu $78,667 ne’e koloka ba Bankada Parlamentár FRETILIN, CNRT, PLP, PD, KHUNTO, UDT/FM no PUDD.

Entretantu, nia informa, Komisaun Espesializada sira mak hanesan Komisaun A (trata asuntu Justisa no Konstitusionál) hetan $12,913, Komisaun B (Negósiu Estranjeiru, Defeza no Seguransa) hetan $13,799, Komisaun C (Finansa Públika) hetan 15,153, Komisaun D (Ekonomia no Dezenvolvimentu hetan $11,108.

Nune’e mós Komisaun E (Infraestrutura) hetan $15,172, Komisaun  F (Saúde, Seguransa Sosiál no Igualdade Jéneru) hetan $12,606 no Komisaun G (Edukasaun, Juventude, Kultura no Sidadaia hetan $15,248.

Hosi parte Konsellu Fiskalizasaun Sistema Nasionál Intelijénsia Timor-Leste hetan $5,791,  Grupu Feto Mulheres Parlamentár Timor-Leste hetan $3,912, Gabinete Sekretáriu-Jerál Parlamentu hetan $7,394, Gabinete Auditoria Interna $4,429.

Ba Diresaun Jestaun Finanseira $133,599, Diresaun Rekursu Umanu no Formasaun hetan $256,689, Diresaun Apoiu Parlamentár hetan $9,757 no Diresaun Komunikasaun hetan $17,149.

Nune’e mós ba Divizaun Planeamentu, Monitorizasaun no Avaliasaun hetan $1,192, Divizaun Protokolu hetan $1,910, Organizasaun Globál Parlamentár Kontra Korrupsaun hetan $7,725, Sentru Promosaun Igualdade Jéneru hetan $1,717.

Orsamentu ne’ebé aloka ba Gabinete Estudu Estratéjiku no Jurídiku hetan $2,004, Gabinete Relasaun Internasionál no Kooperasaun hetan rihun $727 no Konsellu Konsultivu Fundu Petrolíferu hetan $21,178.

Entretantu, Dotasaun Orsamentál Temporáriu (DOT) ba fulan-marsu nian, Parlamentu Nasionál simu ona maibé montante orsamentu nafatin laiha mudansa.

Jornalista : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here