Funsionariu husi Ministeriu Saude ho rutina fulan-fulan tama sai bairo komunidade sira hodi rega susuk iha baleta no komunidade nia uma.TATOLI/Antonio Goncalves

DILI, 11 marsu 2020 (TATOLI)–Sentru Saúde Vera Cruz durante fulan-janeiru to’o fevereiru 2020 ne’e rejista ona pasiente ho kazu pozitivu ba  moras dengue hamutuk 52 maka halo tratamentu saúde iha fatin ne’ebá.

Iha fulan-janeiru pasiente ho kazu dengue hamutuk na’in-lima no fevereiru na’in-47. Hosi  pasiente hirak-ne’e maioria maihosi área Dom Aleixo Dili, Vera Cruz, Villa-Verde no Caicoli.

”Ida-ne’e mak dadus ne’ebé rejistu iha sentru saúde vera kruz durante fulan janeiru to’o fevereiru tanba ita hatene katak moras dengue nia tratamentu laiha espesífiku,” relata Xefe Sentru Saúde Vera Cruz, Dulce Pinto Tilman, ba jornalista sira iha ninia servisu fatin, Caicoli, ohin.

Nune’e  mós rejista pasiente ho kazu Infesaun Viás Respiratóriu ka ISPA hamutuk 5.333 ne’ebé maioria akontese ba labarik ho ema boot. Nia parte mós identifika pasiente diareia, moras kulit, asidente trafégu no seluk tan.

Mezmu nune’e, sentru saúde ne’e konsege halo tratamentu saúde ba pasiente hirak-ne’e to’o di’ak no laiha ema ida maka mate tanba iha aimoruk no pesoál saúde sufisiente hodi fó atendimentu.

“To’o agora ami-nia pasiente ho kazu pozitivu dengue seidauk mate, maibé sira ne’ebé komplikadu ami transfere ba Hospital Nacional Guido Valadares (HNGV),” nia tenik tan.

Nia esplika pasiente ho síntoma dengue pozitivu maka isin manas maka’as, mosu kafuak mean iha isin lolon.

Maibé, tuir nia, atu deteta loloos pasiente ne’e sofre moras dengue tenke liuhosi prosesu teste raan.

”Asaun prevensaun ba komunidade atu halo mak ita hatene agora daudaun tempu udan no ita tenke prevene  ba ita-nia an mak hanesan roupa sira tenke aruma ho di’ak hodi tau iha armari laran, labarik sira labele husik isin molik  maibé tenke tau ropa,” dehan Xefe Sentru Saúde Vera Kruz, Dulce Pinto Tilman.

Aleinde ne’e, família idak-idak tenke toba iha muskiteru laran hodi prevene an husi susuk, taka bee nalihun sira, hamoos fo’er iha uma hun no seluk tan.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here