Membru Komisaun A PN, Adriano do Nascimento. Imajen dok. Tatoli

DILI, 10 marsu 2020 (TATOLI)—Deputadu Partidu Demokrátiku (PD), Adriano dos Nascimento hateten veteranu sira-ne’ebé luta iha ai-laran durante tinan 15 to’o tinan 24 presiza hetan tratamentu espesiál hosi Estadu.

Deputadu Adriano konsidera preokupasaun veteranu sira-nian kona-ba pensaun vitalísia no pensaun veteranu tenke balansu ne’e pertinente mabé tenke trata ho sira-nia lei rasik tanba veteranu iha lei própriu.

“Komisaun F ne’e mak toma konta ida-ne’e ne’ebé trata asuntu veteranu nian bele akomoda ho preokuapsaun hirak-ne’e hodi fó solusaun nune’e tratamentu veteranu sira ho dignu. Ema funu tinan 24 ne’e merese duni. Ami tinan-lima de’it, agradese ema bele fó fiar tinan 10 maibé diferente. Tanba ne’e, veteranu sira-ne’ebé tinan 15 ba leten presiza hetan tratamentu espesiál hosi Estadu,” Adriano dos Nascimento dehan iha resintu Parlamentu Nasionál, tersa ne’e.

Nia husu ba Komisaun F ne’ebé trata asuntu veteranu tenke tau konsideransaun ba preokupasaun hosi veteranu sira-nian tanba terus iha ai-laran la’ós fásil.

“Maibé presiza sukat ho ita-nia kapasidade finanseira tanba nasaun Timor-Leste daudaun preokupa ba reseita. Reseita doméstika to’o de’it millaun $200. Agora reseita petrolífera tun ba beibeik tanba Bayu Undang atu maran ona. Greater Sunrise mós seidauk klareza entaun ita enfrenta problema,” nia esplika.

Nia akresenta, veteranu balun to’o agora uma mós laiha no balun atu han-hemu mós susar tebes.

Nia hatutan, veteranu tinan 24 ne’e la barak ida, Estadu la lakon buat ida kuandu dignifika sira-nia moris hodi fó pensaun veteranu ne’ebe tenke balansu ho pensaun vitalísia.

Notísia Relevante: Pensaun Vitalísia no Pensaun Veteranu Tenke Balansu

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here