Tribunal Munisípiu Covalima. Imajen/Foti hosi kronolojía Facebook Nuno Saldanha

SUAI, 10 marsu 2020 (TATOLI)–Tribunal Distritál Suai (TDS)/Tribunal Munisípiu Covalima, liuhosi audiénsia julgamentu, ohin,  halo alterasaun jurídiku krime kontra bandu ba arguidu na’in-rua ho inisiál CM no JB ne’ebé envolve iha kazu hatama pistola rua (2) ho modelu AIR SOFT GUN liuhosi fronteira Batugade, Indonézia mai Timor-Leste.

Tuir depoimentu Ministériu Públiku katak, arguidu na’in-rua nu’udar ko-autór materiál iha konkursu reál ho forma konsumada ba krime sira asosiasaun kriminoza, arma proibida no kontrabandu, previstu no punidu iha artigu 188 númeru 1, artigu 211, númeru 1, artigu 316, númeru 3, no reforsa ho artigu 41 lei númeru 05/2017 kona-ba Lei Arma Branka.

Juiz Singulár Samuel da Costa Pacheco, ne’ebé prezide julgamentu ne’e konfirma katak, razaun tribunál halo fali alterasaun krime ne’e tanba konsidera haree ba tipu pistola ne’ebé tama tuir investigasaun katak pistola refere uza ba treinu desportivu.

Juiz Samuel da Costa Pacheco mós konfirma loloos katak tranzasaun pistola refere la liuhosi dalan legál hanesan alfándega, maibé tama ilegálmente.

Prosesu audiénsia ne’e tuir loloos, ohin, tribunál halo leitura akórdaun finál iha primeira instánsia, maibé tribunál seidauk bele pronúnsia tanba tribunál halo fali alterasaun jurídiku ba krime ne’e, ho nune’e, fó prazu loron 15 ba parte Ministériu Públiku (MP) ho Defeza bele halo re-anúnsiu ba alterasaun refere.

Kronolojia

Iha loron 3 abríl 2018, Polísia Militár halo kapturasaun ba arguidu sira iha foho Manduki hafoin ne’e lori kedas ba Kuartél Polísia Militár hodi halo identifikasaun no submete ba detensaun oras 72.

Tuir depoimentu Ministériu Públiku katak, antes ne’e hosi fonte ka servisu sekretu intelijénsia Ministériu Defeza ho Seguransa nian, arguidu JB, sidadaun Indonézia no arguidu CM nu’udar sidadaun Timor, halo atividade illegál sira hanesan tranzasaun ba arma proibidu, tráfiku ba droga ho matéria proibidu sira ne’ebé mak hatama hosi Indonézia mai territóriu Timor.

Konforme informasaun hosi fonte  konfirmadu katak atividade illegál ne’e arguidu sira hala’o kle’ur ona, hahú hosi tinan-2014 to’o 2018. Nune’e, atu fó kontinuasaun ba informasaun iha leten, ajente sira hosi servisu intelijénsia Ministériu Defeza no Seguransa nian, komesa halibur dadus relevante sira hotu no ikusmai deteta katak, arguidu JB iha pistola automátiku no kilat boot ho modelu AK-77 ho SKS ne’ebé mak arguidu hatudu liuhosi fotografia ba kliente sira, inklui arguidu CM no arguidu JB prontu atu fa’an ba ema ne’ebé mak hakarak sosa.

Bazeia ba informasaun ne’e, ajente intelijénsia sira hosi servisu sekretu Ministériu Defeza no Seguransa nian fó hatene ba Agostinho Sequeira, alias “Somotxo” nu’udar Ministru Defeza no Seguransa iha VII Governu hodi toma desizaun.

Iha altura ne’ebá José Agostinho Sequeira “Somotxo” fó orientasaun ka órden ba Servisu Intelijénsia ho ajente servisu sekretu sira seluk hodi buka informasaun iha terrenu.

Atu fasilita servisu ne’e eis Ministru Defeza no Seguransa, Agostinho Sequeira “Somotxo” mós fó apoiu osan ho montante $3.000.00, ba ekipa servisu ho nia kolega intelijénsia sira, nu’udar meiu ida hodi uza no finje sosa kilat hosi arguidu sira, atu nune’e, bele halo detensaun ba arguidu sira.

Hafoin hetan tiha apoiu finanseiru ida-ne’e, iha loron 04 fevereiru 2018, ajente intelijénsia hamutuk ho arguidu CM dezloka ba Mota-ain no lori osan ho montante $3.000.00 ne’e ba entrega iha arguidu JB hodi arranja kilat referidu hodi transporta mai Timor.

Servisu sekretu intelijénsia Ministériu Defeza no Seguransa nian deside la’o hamutuk ho arguidu CM, tanba arguidu CM koñese di’ak arguidu JB no arguidu na’in rua ne’e servisu hamutuk kle’ur ona hodi hatama sasán sira hanesan manu-futu, Ai-han no Ai-moruk manu-futu nian, inklui arma illegál sira mai Timor-Leste.

Arguidu CM, mós tau fiar ba arguidu JB hodi halo tranzasaun illegál sira ne’e, tanba arguidu JB hela kle’ur ona iha Atambua, autoridade sira iha Fronteira Indonézia ho Timor nian koñese hotu arguidu, ho nune’e arguidu JB fasil tama sai fronteira Mota-Ain.

Ho valór osan $3.000.00 ne’e lori ba entrega ba arguidu JB iha área Batugade, besik fronteira no osan refere atu sosa kilat ho marka AK lolon haat (4) no Pistola automátika lolon rua (2).

Aleinde ida-ne’e, entrega mós osan ho montante $240.00 ba arguidu JB hodi selu transporte no sosa pulsa hodi kontaktu nafatin ho arguidu CM, inklui ajente intelijénsia sira.

Liu tiha semana rua, loron la apuradu maibé iha fulan fevereiru 2018, arguidu JB telefone ba arguidu CM hodi fó hatene katak nia hetan ona kilat ho marka SKS lolon rua (2) no husu ba arguidu CM ho nia kolega sira bele ba foti iha Batugade.

Iha loron ne’e kedas, purvolta tuku 9:00 ka tuku 10:00 hanesan ne’e, arguidu CM hamutuk ho ekipa sekreta hosi Timor-Leste dezloka ba fronteira atu foti kilat refere, maibé kuandu tuku 16:00 Otl, sira to’o iha área fronteira, arguidu JB telefone ba arguidu CM hodi fó hatene katak sira fila ona bá Atambua, tanba portaun fronteira nian taka ona.

Liu tiha semana balun, kuaze fulan ida hanesan ne’e, arguidu CM hateten ba grupu intelijénsia sekreta halo finje hanesan kompradór katak, nia foin hetan kontaktu husi arguidu JB via telefone hodi fó hatene katak, nia hetan ona pistola rua, no husu ba arguidu CM ho nia kolega sira bele ba foti iha loron 03 abríl 2018.

Rona tiha informasaun ne’e, ekipa intelijénsia sira pasa informasaun ba iha Polísia Militár (PM) sira hodi halo planu atu nune’e iha loron ne’ebé determinadu ona atu simu Pistola rua (2) ne’e hosi arguidu JB, karik iha posibilidade bele halo kedas kapturasaun ba arguidu JB ho CM.

Hafoin tuir mai iha loron 03 abríl 2018, arguidu CM hamutuk ho intelijénsia sira dezloka ba fronteira Batugade hodi hasoru malu ho arguidu JB.

Iha momentu ne’ebá ekipa ne’e hateten ba arguidu JB katak, pistola rua ne’ebé mak tau metin ona iha mala ne’e, di’akliu entrega iha karreta laran de’it no arguidu JB mós halo tuir hodi sa’e hamutuk karreta refere hodi sira sai hosi fronteira Batugade nian mai fali diresaun Dili nian.

Kuandu sira ho karreta refere to’o iha foho Manduki nian, karreta ida ultrapasa sira no blokeia kedas dalan no iha tempu hanesan halo mós kapturasaun ba arguidu JB no CM inklui ajente intelijénsia ne’ebé mak hamutuk ho arguidu sira iha karreta laran  hodi lori direta ba Kuartél Polísia Militár iha Dili.

Hosi arguidu JB nia liman prende Pistola lolon rua ho modelu AIR SOFT GUN marka Pietro Bereta ho númeru seriál 5802, bala-musan masa ki’ik rua ho totál bala musan hamutuk 565.

Tuir relatóriu teste balístiku ne’ebé mak halo teste laboratóriu ba Pistola rua hatudu katak pistola sira ne’e normalmente uza ba tiru desportivu no ba kasa animál.

Relatóriu finál ne’e mós konfirma katak, Pistola rua ne’e ho marka modelu AIR SOFT GUN ne’e la utiliza hodi halo defeza pesoál, no proibidu uza ba halimar ka tiru arbiru, tanba bele fó perigu ba ema nia vida.

Pistola AIR SOFT GUN normálmente koñesidu ho naran Unit Pietro Barreta M83 FS, hanesan arma replika ida ne’ebé fizikamente nia medida hanesan kedas ho arma fogu no nia funsionamentu pistola ne’e rasik la hanesan ho arma orijinál, tanba uza botija (arkompremidu/CO¬¬¬2).

Pistola modelu AIR SOFT GUN ne’e mós bele halo kuak triplex no kalén ho lata mamuk sira, tanba ne’e bele dehan katak perigozu, bainhira kona ema nia isin-lolon rezulta ema bele  mate.

Projetil ne’ebé uza ba pistola AIR SOFT GUN mak Projetil Ball Bearing (BB) Gotri (Metal) 6 mm, ho nia todan grama 1 to’o grama 1,5 ba leten.

Haktuir dokumentu ne’ebé iha autos, hatudu katak entre arguidu JB ho CM iha ona rede koneksaun ba estrutura krime organizadu nian ne’ebé mak estabelese kleur ona ho objetivu hodi hatama sasán illegál sira hanesan kilat, pistola ho droga sira mai Timor-Leste.

Dokumentu ne’e mós hatudu katak, individu ho naran Aria, militár ativu Indonézia (Fontes I), fasilita arguidu JB (Fontes II) hodi sosa arma sira hatama mai Timor-Leste, liuhosi fronteira Batugade.

Arguidu CM (Fontes III)  sidadaun Timoroan  nia papél simu arma hosi arguidu JB hodi buka kliente (kompradór) sira iha Timor-Leste.

Arguidu JB ho CM organiza ona planu ida ho soldadu militár Indonézia nian balun  hodi hatama kilat ka arma de fogu sira ho tipu AK, SKS, ho pistola automátika sira mai fa’an iha territóriu Timor-Leste.

Planu ne’e realiza duni no arguidu JB konsege lori arma de fogu ida marka SKS mai territóriu Timor-Leste liuhosi Batugade, Munisípiu Bobonaro, maibé la konsege realiza tranzasaun ba arma refere tanba arguidu CM ho ajénsia intelijénsia sira ne’ebé iha altura ne’ebá sai hanesan kompradór ba arma ne’e atraza/tarde to’o iha fronteira ho nune’e arguidu JB ho nia kolega Aria (soldadu TNI) lori fali arma ne’e ba Indonézia.

Faktu iha leten demonstra katak arguidu sira iha esperiénsia no abituálmente halo atividade ilísita sira relasaun ho tranzasaun ba arma de fogu.

Ho hahalok sira ne’e hotu arguidu JB ho CM nu’udar ko-autór material iha konkursu real ho forma konsumada ba krime sira asosiasaun kriminoza, arma proibida no kontra bandu, previstu no punidu iha artigu 188 númeru 1, artigu 211 númeru 1,artigu 316 númeru 3, hotu-hotu hosi kódigu penal Timor-Leste no reforsa ho artigu 41 lei númeru 5/2007, 15 abríl, kona-ba rejime jurídiku relative no prátika arte marsiál, rituál, arma no rama ambon.

Iha audiénsia julgamentu ne’e, arguidu sira hetan asisténsia legál hosi Defensór Fernando da Costa  no Ministériu Públiku reprezenta hosi Prokuradór Jacinto Babo.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here