Deputadu Bankada CNRT, Adérito Hugo da Costa. Imajen Tatoli/ Egas Cristóvão

DILI, 10 marsu 2020 (TATOLI)—Deputadu Bankada Parlamentár Partidu Congresso Nacional de Reconstrução Timorensse (CNRT), Adérito Hugo da Costa, apresia ho serbisu  ajente polísia ne’ebé investiga kazu osan falsu maibé tenke asegura dokumentu investigasaun atu nune’e públiku labele hatene.

Nia lamenta, bainhira ajente polísia ne’ebé envolve iha prosesu investigasaun mak fó-sai fali rezultadu investigasaun ne’e ba iha mídia sosiál tanba asuntu ne’e ita tenke garante ninia sizilu.

“Asuntu ne’e detalla liu ita bele kontinua iha komisaun espesializada (Komisaun B) ninian tanba asuntu ne’e ita tenke garante ninia sizilu. Ita tenke halo ho portaun  fechada. Ha’u agradese ho polísia nia serbisu liga ba kazu ne’ebé akontese. Sizilu informasaun ne’ebé ke tuir loloos asegura ho didi’ak no kuidadu, tenke asegura dokumentu sira-ne’ebé la’ós konsumu públiku ninian,” dehan Deputadu Bankada CNRT atuál Prezidente Komisaun B (trata asuntu Defeza no Seguransa), Adérito Hugo da Costa, liuhosi plenária iha Parlamentu Nasionál.

Nia afirma, loloos kazu ne’e labele fó-sai ba públiku iha prosesu sira hanesan ne’e, ajente polísia sira-ne’ebé fósai ne’e kestaun profisionalizmu.

Hugo afirma, se sizilu informasaun ne’e la esplika liuhosi facebook ema sei la komenta kazu ne’e, tanba informasaun ne’ebé fó-sai kredivel no iha membru entervista.

“Dokumentu ne’e tuir loloos sizilu (segredu), sé no kazu parte sira-ne’ebé envolve iha video ne’e hosi parte ita-nian ne’e sériu, ita tau instituisaun iha kestaun boot,”  nia dehan.

Iha fatin hanesan, Deputada CNRT, Maria Fernanda Lay, la dúvida ho profesionalizmu polísia no forsa nian tanba instituisaun rua ne’e halo serbisu ho integridade.

“Ha’u fiar katak ho asaun Parlamentu Nasionál konvida Ministru Defeza no Komandante Jerál PNTL la’ós dezakredita katak lafiar ita-boot sira-nia papél maibé bolu atensaun katak segredu justisa labele sai konsumu públiku. Ha’u fair katak PNTL sei ba investiga sé mak fó-sai notísia ne’e ba públiku,” nia hateeten.

Entretantu, Deputadu Bankada Demokrátiku (PD), Adriano do Nascimento hateten, ho kazu ne’e deskonfia grupu organizadu eziste iha Timor-Leste inklui halo falsu osan.

“Bele mós fase-osan, sera que ita boot atu halo desmantelamentu rede organizadu ne’e iha ita-nia rai. Oinsá ita-boot sira-nia koordenasaun ho Amérika, ne’ebé na’in ba osan dolar ne’e tanba FBI no CIA bele mós hola-parte iha prosesu ne’e,” nia dehan.

Xefe Bankada Parlamentár CNRT, Deputadu Duarte Nunes, espera informasaun ne’ebé fó-sai la’ós hosi ekipa investigasaun ne’ebé haruka ba Indonézia.

“Ita ba hetan dadus iha ema-nia rai, ita mai publika fali iha ita-nia rai, ida-ne’e mak ami preokupa. Ha’u espera ne’e hanesan promesa ida hosi ministériu, iha tempu seluk bele fó nune’e kredibilidade PNTL nian ita kaer nafatin,” nia haklaken.

Entretantu, Xefe Bankada Parlamentár PLP, Cornelio Gama “L7”, fó hanoin katak loloos kazu sira hanesan ne’e debate de’it iha komisaun B, la presiza iha plenária.

“Ita ko’alia hanesan ne’e la sekreta ona. Sekreta ne’e tenke sekreta dun. Ne’ebé, ema rona ita ko’alia iha ne’e aban ema sa’e aviaun ba hotu ona,” Veteranu L7 ne’e fó hanoin.

Deputada CNRT, Carmelita Caetano konsidera video ne’ebé fó-sai kona-ba osan falsu ne’e hanesan defamasaun ho karáter asasinatu.

“Ita haree hosi video ne’ebé viral ne’e tama ona iha planu sistemátiku ida hodi ataka ita-nia líder másimu sira, ne’e grave,” nia hateten.

Hatán ba ptreokupasaun hirak ne;e, Ministru Defeza no Interiór Interinu, Filomeno Paixõ de Jesus, esplika ajente ne’ebé deskonfia (fó-sai video) iha ona prosesu disiplinár.

“Ita halo koordenasaun la’ós PNTL mesak maibé ho organizmu barak inkluzivu internasionál, detallu liu ami sei esklarese ba Komisaun B. Kona-ba bolu informasaun sizilu ami toma nota,” Ministru Defeza no Ministru Interiór Interinu ne’e responde.

Governante ne’e dehan, informasaun kona-ba produsaun osan falsu ne’e rumor tanba orienta ona Komandante PNTL hodi investiga no halo ona investigasaun.

“Ha’u dehan rumoris tanba tribunál Indonézia seidauk dehan ne’e iha duni ka lae. Ha’u kontinua repete ne’e rumoris mas afirma esforsu iha komandu polísia sei hatún ba Komisaun B para ami esplika esforsu ne’e halo nusá,” nia dehan.

Notísia Relevante: Investiga Kazu Osan Falsu, Ministru Filomeno Paixão Orienta PNTL Entrega Dokumentu Ba PSIK

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here