Diretór Diresaun Nasionál Organizasaun Urbana, Hermínio Moniz Ribeiro. Imajen Tatoli/Julia Chatarina

DILI, 10 marsu 2020 (TATOLI)–Diretór Diresaun Nasionál Orgnizasaun Urbana, Ministériu Administrasaun Estatal (DNOU-MAE), Hermínio Moniz Ribeiro hateten katak Governu liuhosi DNOU-MAE atu implementa tan estasionamentu ba munisípiu haat hanesan Baucau, Bobonaro, Liquiçá no Ermera.

“Ami iha ona hanoin ida atu implementa tan estasionamentu iha munisípiu haat hanesan Baucau, Bobonaro, Liquiçá no Ermera. Tanba, ita haree katak munisípiu haat mós iha fatin ne’ebé mak atrai ema hodi vizita. Entaun, ita monta estasionamentu hodi nune’e hafasil movimentu transporte públiku,” dehan Diretór DNOU, Hermínio Moniz Ribeiro, ba Ajénsia TATOLI iha nia knar fatin, Caicoli, Dili.

Diretór ne’e hatutan, ezisténsia estasionamentu iha munisípiu haat refere atu hafasil karreta ho motór hodi labele para arbiru no iha parte seluk Governu mós bele hetan reseita husi estasionametu sira-ne’e.

“Ita kria tan estasionamentu iha fatin balun hanesan munisípiu haat ne’e, nune’e hafasil karreta no motór sira bainhira para. Liuhosi estasinamentu ne’e, ita bele hetan reseita ba Estadu ida-ne’e,” nia dehan.

Nia hatutan, Governu iha mós planu atu estabelese tan estasionametu ida iha Mota-ain nian tanba fatin ne’e movimentu tebes husi ema no transporte tama-sai.

“Ita iha planu atu estabelese tan estasionamentu ida iha fronteira Mota-ain nian nune’e fatin ne’e ita haree organizadu husi movimentu ema ho transporte bainhira tama-sai,” nia esklarese.

Aleinde estasionamentu, diretór Hermínio Móniz relata katak sira mós hanoin atu estabelese tan publisidade no toponomia ba fatin refere.

Notísia relevante:Munisípiu Dili Sei Estabelese Tan Estasionamentu

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here