Jogadór no estrutura Lalenok United FC festeja sira-nia vitória. Imajen Mídia LFA

DILI, 09 marsu 2020 (TATOLI)-Treinadór Klube Lalenok United FC, Simón Elissetche hateten nia parte sei halo tan kontratu foun ba jogadór Brazileiru, Italo Pimentel atu mai Timor-Leste hodi reforsa klube ne’e iha Liga futeból Amadora, époka 2020.

Iha fulan hirak kotuk, Klube Lalenok United termina kontratu ho jogadór Brazíl ne’e hodi fila ba ninia nasaun orijen.maibé iha tinan ne’e tenke fila mai Timor-Leste hodi reforsa klube ne’e iha LFA 2020.

“Ami hein hela jogadór Italo Pimentel nia mai lais di’ak liu. Hein de’it karta transferénsia hosi klube ida ne’ebé agora dadauk nia joga hela iha Brazíl ne’e aseita nia mai ona Timor,”tenik Simon ba TATOLI iha Praia dos Coqeiros Dili, ohin.

Iha fulan hirak liubá jogadór hosi klube Lalenok United FC tenke derota ho klube PCM Makasar Indonézia iha jogu play Off Asian Football Confederatin (AFC) Cup tanba ho auzénsia hosi Jogadór Brazileiru Italo.

Antes ne’e ho prezensa Jogador Brazíl ne’e maka konsege lori Lalenok United ultra pasa hosi segundu divizaun ba primeira divizaun LFA no ikus sai kampiaun ba Liga Futeból Amadora , Tasa 12 novembru no super tasa époka 2019.

Kona-ba preparasaun hodi hasoru LFA époka 2020, Nia dehan Klube Lalenok United FC preparadu ona atu kompete ho klube seluk iha époka ida ne’e.

“Semana haat ona ami halao treinamentu, ami halo jogu amizade dalarua ona kualidade jogadór sira di’ak tebes. Sabadu agora ami sei halo jogu amizade hasoru selesaun nasionál senior,” katak trainadór Simon.

Jogadór estranjeiru na’in lima kompostu hosi Fabio Christian Cotinho, Italo Pimentel Brazíl, Daniel Adadi, Nat Ghana no Allan Manjo hosi Xile, maka sei reforsa Lalenok United FC iha LFA 2020.

Jornalista : Hortencio Sanchez

Editór    : Agapito dos Santos

HAKEREK NO HATÁN

Please enter your comment!
Please enter your name here