Imajen Espesiál

DILI, 09 marsu 2020 (TATOLI)–Diretór Deputi Judicial System Monitoring Program (JSMP-inglés), Casmiro dos Santos hateten, JSMP preokupa ho desizaun husi Tribunal ne’ebé mak dala barak fó suspensaun ba arguidu ba kazu violénsia doméstika.

“Durante ne’e ami mós preokupa ho desizaun husi Tribunal ne’ebé mak dala barak fó suspensaun ba arguidu ba kazu violénsia doméstika,” dehan Casmiro dos Santos ba Jornalista sira iha nia knaar fatin Colmera, Dili, ohin.

Nia hatutan, kazu violénsia doméstika ne’ebé rejistu iha Tribunal kuaze nia solusaun mak suspensaun ho nune’e vítima balu deskoraza ho desizaun.

“Entaun solusaun hanesan suspensaun ita bele dehan iha tendénsia no iha pusibilidade boot ba arguidu atu aumenta tan krime tanba arguidu rasik nia la sente tauk tanba laiha sentensa ida,” nia afirma.

Nia dehan, Tribunal mós daudaun ne’e esforsu atu koko haree situasaun ne’e no ba oin sira sei halo mudansa sentensa ba kazu violénsia doméstika nian. .

Relasiona ho kazu violénsia doméstika ne’ebé aumenta tinan-tinan, nia hateten, JSMP durante ne’e mós disimina informasaun ba komunidade kona-ba violénsia doméstika no oinsá atu asesu ba prosesu justisa tradisionál nian.

Tanba, nia haktuir, dala barak prosesu inísiu ne’e iha polísia depois kontinua ba iha Tribunal maibé kazu barak sira labele uza prosesu justisa formál no balu sira kontinua uza dalan tradisionál tanba kazu hotu labele destingi entre kazu krime públiku no kazu semi públiku.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here