Xefe Estadu Maiór Jenerál Forsa Armadas Portugál, Almirante António Silva Ribeiro, tara medalla kondekorasaun “Cruz São Jorge” ba Diretór IDN-TL, Donaciano Costa Gomes “Pedro Klamar Fuik”. Imajen/IDN-TL

DILI, 10 marsu 2020 (TATOLI)–Xefe Estadu Maiór Jenerál Forsa Armada Portugál, Almirante António Silva Ribeiro, atribui medalla kondekorasaun “Cruz São Jorge” ba Diretór Institutu Defeza Nasionál Timor-Leste (IDN-TL), Donaciano Costa Gomes “Pedro Klamar Fuik” durante vizita servisu bá Lizboa, Portugál, iha loron 9 marsu 2020.

Diretór IDN, Pedro Klamar Fuik, orgullu no onradu tanba konfiansa ne’ebé CEMGFA-Portugál hatudu nu’udar jestu rekoñesimentu ba méritu ne’ebé Diretór IDN hatudu durante ne’e.

Instituisaun Forsa Armada Portugál entrega medalla Kondekorasaun “Cruz São Jorge” ba IDN-TL tanba hosi sira-nia avaliasaun haree ba personalidade Diretór IDN ne’ebé hatudu nia prestasaun servisu di’ak iha área militár no sivíl.

Komunikadu imprensa hosi IDN ne’ebé dirije mai iha Agência Tatoli, ohin, relata katak kondekorasaun ne’ebé Instituisaun Forsa Armada Portugál oferese, iha klase haat (4) mak hanesan, klase dahuluk ba Ofisiál Jenerál, Kapitaun-de-Mar-Guerra ka Koronél, Klase daruak ba Kapitaun Fragata, Tenente Koronél, Kapitaun Tenente no Majór, klase datoluk ba Kapitaun Tenente, Kapitaun no ofisiál sira, Postu Inferiór Sarjentu no ikusliu klase ba Sarjentu no Prasa.

Pedro Klamar Fuik hateten, medalla kondekorasaun ne’e importante tebes ba instituisaun Forsa Armada Timor-Leste nian, tanba medalla “Cruz São Jorge” reprezenta Padrueiru Forsa Armada Portugés nian ne’ebé eziste kuaze tinan  700 ka 800 ona.

“Hanesan timoroan ida, ha’u hetan kondekorasaun ne’e, reprezenta orgullu boot ba ha’u no instituisaun  FALINTIL-Forsa Armada. Ha’u servisu ba partikulár no ein-jerál  ba povu Timor -Leste tomak,”  dehan Pedro Klamar Fuik.

Nia dehan, medalla ne’e  reprezenta méritu militár ida hala’o presta servisu kooperasaun entre militár.

“Ha’u kontente simu medalla ne’e, tanba Portugál ho Timor-Leste iha istória kooperasaun ida naruk, hahú tempu beiala sira iha, servisu boot iha militár Portugés sira apoiu iha tempu pasadu. Kontinua ba tempu okupasaun, inklui  tempu períodu pos libertasaun. Militár Portugés sira kontinua servisu hamutuk ho ita hodi hametin nafatin espíritu kooperasaun entre Timor-Leste ho Portugal,” afirma Diretór IDN-TL.

Eis Komandante Komponente Navál ne’e hatutan, medalla ne’e reprezenta méritu timoroan sira ne’ebé nia reprezenta hodi simu,  nune’e hametin kooperasaun militár Portugál ho militár Timor-Leste.

“Ha’u hakarak dedika medalla ida-ne’e ba eis tropa militár Portugál hosi timoroan lubun ida uluk, serbí iha militár Portugés. Medalla ne’e mós dedika omenajen ba militár Portugés timoroan sira ne’ebé mate ona inklui ba sira ne’ebé sei moris hodi oras ne’e balun sei presta hela dedikasaun iha Instituisaun F-FDTL,” nia hateten.

Pedro Klamar Fuik tenik, medalla ne’e lori mensajen ba partikulár ba iha IDN, no Instituisaun F-FDTL hanesan motivasaun di’ak ba formasaun militár ho profisionál iha dedikasaun prestíjiu no méritu hodi hetan kondekorasaun ida-ne’e.

“Kondekorasaun ha’u simu fó motivasaun di’ak ida ba militár sira hotu iha instituisaun F-FDTL, nune’e aban-bainrua hala’o sira-nia karreira, tenke ho profisionalizmu,” tenik nia.

Tuir Diretór IDN-TL nia haree Xefe Estadu Maiór Jenerál Forsa Armada Portugál, António Silva Ribeiro hanesan amigu Timor nian, ne’ebé nia servisu ho Timor-Leste hahú iha tempu okupasaun to’o tempu libertasaun independénsia kontinua fó nia apoiu liuhosi kooperasaun defeza rai rua ohin ba futuru sei kontinua metin nafatin.

Serimónia ne’e hetan partisipasaun hosi família Adidu Defeza Timor nian iha Portugal, Koronél Rairia, Diretór Jerál Administrasaun IDN, Ivonio Marçal , Asesór Militár Portugál iha IDN, no reprezentante Forsa Armada Portugál nian iha Auditóriu CEMGFA, Belem, Lizboa.

Jornalista: Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here