Diretora Nasionál Abordajen Integradu, Kapasitasaun Feto (DNAIJKF-SEII), Maria Filomena Babo Martins. Imajen TATOLI/Osória Marques.

DILI, 09 marsu 2020 (TATOLI)–Diretora Nasionál Abordajen Integradu, Kapasitasaun Feto (DNAIJKF-SEII), Maria Filomena Babo Martins hateten Governu liuhosi Sekretaria Estadu Igualdade no Inkluzaun (SEII) apresia tebes ho International Organization for Migrationg (IOM-sigla inglés) ne’ebé mak fó formasaun ba asosiasaun feto no pontu vokál sira kona-ba Violénsia Bazeia ba Jéneru (VBJ) husi munisípiu hotu.

“Governu husi SEII apresia no agradese tebes ho formasaun kona-ba violénsia bazeia jéneru ne’e tanba kustu hotu IOM mak kobre,” dehan Diretora Nasionál Abordajen Integradu, Kapasitasaun Feto (DNAIJKF-SEII), Maria Filomena Babo Martins, ba jornalista sira hafoin partisipa formasaun VBJ iha UN Coumpound, Caicoli, Dili, ohin.

Nia dehan, partisipante sira ne’ebé mak partisipa ba formasaun ne’e iha oportunidade hodi aprende barak nune’e loke no kapasita sira-nia an oinsá mak bele halo prevensaun ba kazu refere.

“Partisipante sira iha oportunidade ba loron ohin no tuirmai hodi aprende saida mak violénsia bazeia jéneru no oinsá mak bele prevene aktu hirak-ne’e,” nia enkoraja partisipante sira.

Relasiona ho formasaun ne’e, nia informa, bainhira partisipante sira aprende ona no sira rasik sei halo prevensaun ba kazu refere ba iha futuru.

“Ha’u espera katak sira sei fó disponibilidade tempu ho di’ak no partisipa ho ativu atu aprende buat barak liu iha formasaun ne’e,” nia hateten.

Notísia relevante: Hamenus Violénsia Bazeia ba Jéneru, Mane Tenke Tau Matan ba Feto

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here