Vise-Prezidente BNCTL, António Florindo Abrantes. Imajen Tatoli/Jogerjo Guterres

DILI, 10 marsu 2020 (TATOLI) – Vise-Prezidente Banku Nasionál Komérsiu Timor-Leste (BNCTL-sigla portugés), António Florindo Abrantes, informa tuir dadus ne’ebé Banku Nasionál ne’e iha, daudaun ne’e kréditu husi kliente sira seidauk selu hamutuk millaun $10.

“Kréditu ne’ebé maka seidauk selu hamutuk millaun $10-resin, ba de’it kréditu hodi finansia projetu”, tenik Vise-Prezidente BNCTL ba Agência Tatoli iha ninia knaar fatin, Timor Plaza, tersa ne’e.

Nia dehan, kréditu balun mai husi grupu agrikultór, maibé ba grupu ne’e laiha problema iha pagamentu.

Relasiona ho preokupasaun atrazu iha pagamentu kréditu, tuir Vise-Prezidente ne’e banku nasionál koordena nafatin ho Governu ne’ebé maka hanesan na’in ba projetu no empreza ne’ebé ezekuta obra.

“Ami mós akompaña ona prosesu ne’e, tanba projetu balun finaliza ona maibé Governu sei selu fazeadamente. Projetu ne’ebé ami finansia hamutuk projetu 60-resin iha teritóriu Timór”, nia akresenta.

Nia subliña, BNCTL mós rona diretamente preokupasaun hosi empreza sira no problema ne’ebé empreza sira hasoru bainhira hala’o projetu maka kompensasaun ba komunidade nia ai-horis ka rai ne’ebé utiliza ba projetu ne’e rasik.

Problema seluk tan maka projetu ramata ona maibé Governu seidauk halo pagamentu.

Maski nune’e, Governu fó garantia ona ba banku katak Governu sei selu projetu sira ne’e maibé la’ós selu dala-ida tanba dadaun ne’e mákina Estadu la’o hela ho orsamentu doudésimu.

“Bainhira empreza sira selu kréditu atraza maka banku sei aplika penalidade, ne’ebé aplika jurus porsentu 12 kada tinan. Maibé antes atu aplika penalidade ne’e sei haree filafali preokupasaun ne’ebé empreza sira hasoru tanba kulpa ne’e la’ós mai hotu hosi empreza”, nia salienta.

António Florindo adianta, daudaun ne’e emprezáriu timoroan balun halo kréditu iha BNCTL desde 2016 hodi finansia projetu, maibé to’o oras ne’e seidauk selu hotu.

“Durante ami fó kréditu ba klienta banku, ami hasoru duni difikuldade oituan maka finansiamentu ba projetu sira, tanba atrazu iha pagamentu. Ami finansia desde 2016 no 2017 maibé to’o agora seidauk selu hotu”, nia dehan tan.

 Jornalista: Antónia Gusmão

Editora: Julia Chatarina   

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here