Vise-Prezidente ANPM, José Gonçalves, hafoin asina akordu ho empreza xineza hodi hala'o eksplorasaun Mármore .Imajen Tatoli/António Gonçalves

DILI, 10 marsu 2020 (TATOLI)–Autoridade Nasionál Petróleu no Minerál (ANMP) reprezenta Ministériu Petróleu no Rekursu Minerál (MPRM), asina akordu kontratu ho empreza lokál Uma Marble Timor (UMT), Lda hodi hala’o atividade prospesaun no peskiza daruak  ba fatuk mármore iha parte norte, Suku Uma-Kaduak, Postu Administrativu Laclo, Munisípiu Manatuto.

Vise-Prezidente ANPM, José Gonçalves, informa akordu daruak ne’ebé autoridade selebra iha 2020 ne’e ho objetivu atu prepara avaliasaun ba potensialidade rekursu mármore ba dezenvolvimentu komersiál  iha área dedikadu ne’ebé lokaliza iha  área norte ho períodu tinan-ida, ho opsaun estensaun ba tinan-ida.

“Ohin, ami selebra tan  akordu kontratu ba peskiza rekursu mármore nian ho kompania Uma Marble Timor Lda, ne’ebé rejistu iha Timór no na’in husi timoroan”, tenik José Gonçalves, hafoin asina akordu iha Salaun Ministériu Finansa, Aitarak-Laran, Dili, tersa ne’e.

Responsável ne’e adianta, empreza UMT sei halo peskiza iha área parte norte besik tasi-ibun Postu Administrativu Laclo, Munisípiu Manatuto  nian, tanba kompañia Elegant Marble Group Unip, Limitada (EMG) husi Xina halo mós peskiza iha área parte foho, Postu Administrativu Laclo.

Nia informa, empreza UMT halo peskiza durante tinan-ida no posibilidade estende ba tinan-ida tan ho orsamentu $600.000 ho área peskiza iha parte norte Postu Administrativu Laclo ho ektare 400.

“Ita hein sira halo peskiza hafoin faze ida tuirmai ita bolu faze dezenvolvimentu produsaun ne’ebé sei presiza kontratu ida tan hodi fó dalan ba sira atu ke’e hodi fa’an ba iha merkadu,” nia akresenta.

Durante períodu peskiza, nia dehan, empreza UMT sei hala’o servisu tékniku sira hodi determina kualidade no mós kuantidade mármore molok relata viabilidade komersiál husi dezenvolvimentu rekursu mármore mai ANPM iha fin husi períodu prospesaun ida-ne’e.

Hafoin servisu prospesaun nian, Governu bele hili dalan atu partisipa iha investimentu ida-ne’e hodi dezenvolve no komersializa rekursu mármore ho hanoin hodi hetan valór ne’ebé ótimu husi dezenvolvimentu rekursu refere.

Husi sorin seluk, Diretór Ezekutivu Uma Marble Timor (UMT), Lda, Jackson Lay, hateten kompañia ne’e kompostu husi investidór na’in-rua husi Singapura ho kompromisu sei iha faze peskiza, nune’e iha futuru halo produsaun hodi benefísia ba sidadaun tomak.

“Ami-nia misaun mak atu investe iha rekursu mármore hodi lori produtu ba mundu atubele koñese di’ak liután Timor-Leste no kria kampu traballu ba komunidade lokál, fó treinamentu no mós hasa’e kapasidade ba trabaladór sira iha área peskiza nian, inklui fora husi área ne’ebá,” nia garante.

Ho nune’e, Diretór Ezekutivu UMT ne’e iha esperansa katak ho investimentu ne’e, bele aumenta senseramente rendimentu ba uma-kain direta no indireta ne’ebé asosiadu ho indústria mármore no  fó taxa ba kofre Estadu.

Nia afirma UMT sei haka’as-an servisu iha peskiza no prospesaun  atu hamosu koñesimentu di’ak ba potensialidade mármore ne’ebé komersialmente viável atu avansa ba produsaun.

Durante peskiza,  UMT sei tau atensaun ba saúde, aplika segurasa servisu nu’udar prioridade dahuluk no garante implementa impaktu mínimu ba risku ambientál.

“Bainhira peskiza ne’e hatudu mármore ekonomikamente viável atubele avansa ba produsaun mak ami halo planu atu prodús bataku mármore hodi esplora, alarga atividade ne’e atubele iha valór adisionál atu prosesa bataku no aumenta harii fábrika atubele prodús produtu finál ba hanesan azuleju no arte, inklui halo rahun uza ba konstrusaun”, nia subliña.

Nune’e, Diretór UMT ne’e husu ba komunidade no autoridade lokál, ANPM, TradeInvest, no Sekrétariu Estadu Ambiente  (SEA) atu fó apoiu ba atividade peskiza, nune’e bele promove mármore atubele benefísia ba komunidade tomak nia moris di’ak.

Iha loron 14 fevereiru, ANPM mós asina kontratu prospesaun no peskiza mármore ho kompañia EMG, Lda husi Xina atu halo peszkia mós iha área súl ka foho,  Suku Uma-Kaduak, Postu Administrativu Laclo, Munisípiu Manatuto ho kustu investimentu $800.000 iha área ektare 16.000.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here