Sekretáriu Ezekutivu AJTL, Acacio Pinto (klaran), Zevonia Vieira nu’udar Prezidente AJTL (karuk), Constancio Vieira, jornalista RTTL,EP (kuana) akompaña hosi membru sira seluk halo deklarasaun ba imprensa iha sede AJTL Fatuhada. Dokumentasaun TATOLI/Egas Cristovão

DILI, 10 marsu 2020 (TATOLI)–Asosiasaun Jornalista Timor-Leste (AJTL), ohin, estabelese ona akordu ho Universidade Orientál Timor Lorosa’e (UNITAL) hodi kapasita no fó formasaun ba estudante komunikasaun sosiál iha área multimedia, hakerek notísia, fotógrafu, produsaun filme durante tinan ida hahú marsu 2020 to’o 2021.

“Ita iha rekursu umanu sufisiente ne’ebé preparadu ona atu apoiu formasaun ba maluk estudante sira husi komunikasaun sosiál UNITAL nian”, dehan Prezidente AJTL, Zevonia Vieira, ba jornalista sira iha salaun enkontru UNITAL, Becora, Dili.

Jornalista seniôr ne’e haktuir intensaun hosi kooperasaun ne’e atu reforsa abilidade estudante sira-nian iha área komunikasaun sosiál, foku liubá prátika.

“Ami sei mai ho métodu prátika ne’ebé diferente uitoan atu hakerek no halo produsaun. Ami sei hamosu inovativu liuhusi workshop no sei dudu sira bá terenu atu sira bele aprende liután”, nia hatutan.

Hosi rezultadu produsaun informasaun durante prátika, AJTL sei fasilita hodi públika liuhosi mídia online TAFARA.

“Oráriu ba formasaun nian AJTL mak sei prepara depois mak halo komunikasaun ho dosente sira, nune’e bele fó oportunidade ba estudante sira hodi hili klase ne’ebé mak sira atu tuir, tanba AJTL sei oferese formasaun iha área tolu mak hakerek, fotógrafu no produsaun filme”, katak Zevonia.

Iha biban hanesan, Magnífiku Reitór UNITAL, Florindo Pereira, hateten universidade sei estende tan akordu ho AJTL hafoin MoU ne’e termina iha marsu 2021.

“Ha’u hanoin durasaun tinan ida primeiru ne’e ita koko la’o lai hodi haree ninia progresu. Kuandu iha rezultadu di’ak konserteza ita estende liután akordu ne’e ho AJTL”, katak Reitór UNITAL.

Entretantu, estudante komunikasaun sosiál  hamutuk ema na’in 117 husi semestre I, III, V no VII maka sei tuir formasaun ne’ebé oferese hosi AJTL.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here