Reprezentante Organizasaun Mundiál Saúde (OMS), Rajesh Pandav, hamutuk ho Koordenadór Rezidente Nasaun Unida iha Timor-Leste, Roy Trivedy, hasoru malu ho Prezidente Repúblika, Francisco Guterres “Lú Olo”, iha Pálasiu Prezidensiál Bairru-Pite, Dili. Imajen/Mídia PR.

DILI, 09 marsu 2020 (TATOLI)–Reprezentante Organizasaun Mundiál Saúde (OMS), Rajesh Pandav heteten, to’o ohin loron Timor-Leste (TL) seidauk konfirmadu afetadu Coronavirus. 

Rajesh Pandav hamutuk ho Koordenadór Rezidente Nasaun Unida nian iha Timor-Leste, Roy Trivedy, hasoru malu ho Prezidente Repúblika (PR), Francisco Guterres “Lú Olo”, hodi informa kona-ba situasaun atuál hosi Coronavirus (Corona Virus Disease 2019-COVID19) iha Timor-Leste nomós mundiál.

“To’o ohin loron, Timor-Leste laiha kazu konfirmadu. Iha duni suspeitu ida ba kazu COVID-19 maibé seidauk konfirmadu. Bazeia ba protokolu jestaun kliníku ba Moras Coronavirus-2019 (COVID-19) ne’ebé konkorda entre Ministériu Saúde (MdS) no OMS, individu refere iha ona izolamentu dezde oras ne’ebé nia ba fasilidade saúde. Individu refere kontinua iha kondisaun estável no hetan monitorizasaun besik husi Ministériu Saúde. Amostra husi individu ne’e rekolla no manda ona ba Austrália hodi halo teste ba konfirmasaun,” dehan Rajesh Pandav ba jornalista sira iha Palásiu Prezidénsial Bairru-Pité, Dili.

Iha nível globál, Repzentante OMS ne’e informa, deteta ona kazu konfirmadu por volta rihun atus ida, no akontese iha nasaun atus ida resin. Husi kazu sira ne’e, rejista rihun ualu nulu resin iha Repúblika Populár Xina no rihun rua nulu resin iha nasaun seluk.

Husi númeru sira ne’e, tuir nia, ema kuaze rihun tolu mate iha Xina no atus haat husi nasaun sira seluk. Nune’e, taxa mortalidade ba COVID-19 atinje ona 3.4%.

“Maski Timor-Leste seidauk iha kazu konfirmadu maibé reprezentante ONU no OMS husu atu foti medida prevensaun ida adekuadu. Métodu kontrolu ne’ebé Xina halo ne’e di’ak tebes no ida ne’e aplikavel ba nasaun seluk inklui Timor-Leste,” nia dehan tan.

Nia mós sujere atu uza métodu sira ne’ebé uza hodi deteta kazu  coronavirus mak hanesan, ba sentru saúde sira bainhira moras, buka tuir ema sira ne’ebé besik ba ema moras, treinamentu pesoál saúde no prepara fatin karantina.

Reprezentante OMS ne’e haktuir, durante enkontru ne’e Xefe Estadu hato’o nia apresiasaun ba ONU, OMS no MdS no ba entidade tomak ne’ebé halo ona esforsu atu prevene COVID-19.

“Prezidente Lú Olo iha biban ne’e hato’o nia prontidaun atu hato’o Mensájen Estadu ida ba Povu Timor-Leste tomak kona-ba COVID-19,” nia hateten.

Governu Timor-Leste ho serbisu hamutuk ho Organizasaun Saúde Mundiál harii ona ekipa traballu ida hodi haree ba COVID-19.

Notísia Relevante: PM Taur Orienta Liña Ministériu Fó Atensaun Másima Ba Problema Coronavirus

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here