Sekretária Meza Parlamentu Nasionál, Deputada Lídia Norberta dos Santos Martins, Lidia Norberta dos Santos Martins.

DILI, 09 marsu 2020 (TATOLI)—Prezidente Grupu das Mulheres Parlamentares de Timor-Leste (GMPTL), Lídia Norberta dos Santos Martins relata, rezultadu fiskalizasaun hosi GMPTL hatudu katak feto Timor-Leste sira ne’ebé hela iha área rurál seidauk asesu ba saúde, bee-moos no estrada.

Iha loron 8 fulan-marsu komemora loron feto mundiál no Timor-Leste mós selebra loron importante ida-ne’e ho tema “Ha’u Jerasaun Igualdade Konkretiza Feto Sira-nia Direitu.” Tanba sub-tema ida-ne’e fó onra no sakrifísiu inan-feton sira Timor nian ba dezenvolvimentu nasaun, família no sosiedade povu Timor-Leste.

Tuir desizaun GMPTL adota tema hodi hamosu sub-tema “Igualdade Feto no Mane Mak xave ba Dezevolvimentu”.

“Tanba ne’e, ami mós hakarak hato’o mós katak rezultadu fiskalizasaun ne’ebé maka GMPTL nian hatudu katak prosesu dezenvolvimentu iha área oin-oin iha ona rezultadu maibé seidauk favorável mak hanesan asesu ba bee-moos, infraestrutura estrada, ponte no hela-fatin iha área rurál no remota sente difikuldade. Ida ne’e sei fó impaktu negativa ba feto no labarik feto sira, ba inan idoza no defisiénsia sira, liuliu ba inan-feton sira iha área remota no rural,” Prezidente GMPTL, Lídia Norberta dos Santos Martins, hato’o deklarasaun ne’e liuhosi plenária parlamentar iha  Parlamentu Nasionál, ohin.

Nia afirma, ezemplu impaktu negativa hatudu mak hanesan inana-feto sira seidauk asesu ba fasilidade saúde atu trata sira-nia moras, inan isin-rua sira labele asesu ba ambulánsia tanba ambulánsia no ponte seidauk di’ak.

Nune’e mós, nia dehan, inan-feton labele fa’an sira-nia produtu lokál sira iha merkadu tanba laiha transporte atu asesu ba sira-nia hela-fatin.

“Feto maluk sira sente falta ba akompañamentu bainhira prodús sira-nia produtu rasik hanesan produtu artezenatu sira. Feto timoroan balun seidauk hetan kondekorasaun ba sira-nia kontribuisaun iha prosesu luta ba libertasaun nasionál. Inan-feton sira sai vítima iha konflitu pasadu barak seidauk hetan asesu ba saúde, seidauk hetan tratamentu espesífiku ba sira-nia trauma. Vítima nia oan sira barak maka la hetan opurtunidade ba edukasaun no bolsa estudu,” nia hateten.

Prezidente GMPTL ne’e afirma, inan-feton balun seidauk hetan kondekorasaun ba sira-nia partisipasaun iha luta ba Timor-Leste nia libertasaun.

Nune’e mós, nia informa, laiha apoiu ba inan-faluk sira atu hadi’ak sira-nia moris família nia no balun seidauk hetan pensaun veteranu ne’ebé sai vítima iha konflitu pasadu

“Ami GMPTL lori feto-maluk no deputada 25 ne’ebé haknaar aan hanesan reprezentante povu iha Parlamentu Nasionál, hato’o ami-nia saudades no parabéns no hakuak boot ba inan-feton sira iha territóriu nasionál. Espesialmente ba inan-feton sira iha área rurál no área remota sira, ne’ebé fó ona sira-nia kontribuisaun nasaun ida-ne’e. Liuhosi hosi sira-nia sakrifísiu no esforsu tomak loro-loron nian ba oan sira, ba família, ba sosiedade hodi hadi’ak nafatin moris bá-oin ne’ebé di’akliu,” nia dehan.

Prezidente GMPTL ne’e hato’o mós apresiasaun ba parseiru dezenvolvimentu nasionál no internasionál hosi nasaun viziñu Indonézia, Austrália no Portugál ne’ebé mak durante ne’e fó apoia ba Timor-Leste nomós ba mane sira-ne’ebé fó ona apoiu ba GMPTL nia papél no programa sira hodi hadi’ak feto nia direitu no nia kontribuisaun iha Timor-Leste.

Prezidente GMPTL ne’e husu ho espesialmente ba órgaun soberania sira hodi halo reflesaun kona-ba papél no kna’ar loron-loron asuntu feto nian, timoroan sira livre ona hosi diskriminasaun ho forma oinoin.

“Sera que feto maluk sira hetan opurtunidade no liberdade ne’ebé hanesan ho mane maluk sira atu dezenvolve sira-nia aan rasik no sira-nia família. Sera que feto maluk sira prontu ho kualidade, kapasidade no abilidade ne’ebé natoon atu kompete ho mane maluk sira iha área oin-oin no iha nível hotu-hotu,” Prezidente GMPTL ne’e fó hanoin.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here