Komandante Jerál PNTL, Komisáriu Faustino da Costa. Imajen Tatoli/António Gonçalves

DILI, 09 marsu 2020 (TATOLI)- Komandante Jerál Polisia Nasional Timor-Leste (PNTL), Komisáriu Faustino da Costa, afirma, Komandu PNTL seidauk fó sai la rezultadu investigasaun ba kazu autór membru polisia sira ne’ebé deskonfia fahe video investigasaun ba suspeitu prodús osan falsu ne’ebé viral ona iha media sosiál Facebook.

Notísia Relevante : Deskonfia, Polisia Balun Fahe Video Invetigasaun Ba Suspeitu Prodús Osan Falsu Iha Facebook

Komisáriu Polísia Faustino da Costa hateten,  daudaun ne’e ekipa investigasaun sei investiga hela membru sira remata ona foin nia parte halo relatóriu no fó sai.

“Ha’u hanoin prosesu ne’e sei la’o hela, ha’u seidauk bele fó sai ba ita boot sira,” afirma Faustino da Costa ba jornalista, ohin, iha Akademia PNTL, Comoro, Dili.

Antes ne’e, Komisáriu Polísia Faustino da Costa hamutuk ho Segundu Komandante Jerál Komisáriu Mateus Fernandes hala’o konferénsia imprensa hodi husu ba públiku atu labele fiar no fahe kona-ba publikasaun video ne’ebé viral iha Media Sosiál kona-ba kazu prodús osan falsu ne’ebé akontese iha Indonézia.

Iha fatin hanesan, Ministru Defeza no Ministru Interior, Filomeno de Jesus da Paixão, husu ba Komandu PNTL atu investiga membru sira ne’ebé fó sai segredu investigasaun ba públiku hodi prosesa tuir lei.

“Ha’u fó tiha ona instrusaun ba komandu polisia halo investigasaun atu haree se mak halo buat ne’ebé sei segredu Estadu hodi fó sai viral iha media sosiál,” hateten Filomeno Paixão.

Ministru dehan, bainhira investigasaun halo hotu maka membru balun envolve sei prosesa kazu ne’e ba Ministériu Públiku hodi sai lisaun ba membru investigadór sira atu kuidadu bainhira fó sai kualkér informasaun ne’ebé sai segredu  Estadu.

Jornalista : Eugénio Pereira  

Editór       : Francisco Simões

HAKEREK NO HATÁN

Please enter your comment!
Please enter your name here