Imajen Espesiál

DILI, 09 marsu 2020 (TATOLI)—Ohin, Parlamentu Nasionál aprova ona votu pezár ba Eis Membru Asembleia Konstituente, Saudozu Clementino dos Reis Amaral hodi rekoñese saudozu nia serbisu iha lejizlatura dahuluk hodi aprova votu pezár ne’e ho a-favór 37.

Antigu Deputadu Clementino dos Reis Amaral moris iha Luca, Viqueuque, 9 jullu 1936, ne’ebé moris hosi inan-aman Tomás dos Reis Amaral no Maria dos Santos Amaral.

Saudozu Clementino dos Reis Amaral kaben ho Hermenegilda Augusta Marques Alves Amaral ho oan hamutuk ema na’in-haat (4).

Saudozu Clementino dos Reis Amaral hanesan antiga deputadu iha lejizlatura dahuluk, entaun Parlamentu Nasionál aprova votu pezár ne’e hodi rekoñese saudozu iha ninia dedikasaun iha tempu Asembleia Konstituente nian.

Prezidente Parlamentu Nasionál, Arão Noé de Jesus da Costa Amaral hateten, antigu deputadu ne’e merese duni parlamentu fó omenajen tanba sai deputadu iha Asembleia Konstituente.

“Iha primeira lejizlatura, nia deputadu titulár tanba ne’e mak ami haree katak parlamentu tenke halo prestasaun omenajen ida. Ne’e hanesan fó onra omenajen ikus ba antigu deputadu titular,” Arão Noé ko’alia iha Parlamentu Nasionál, segunda ne’e.

Entretantu, Xefe Bankada Parlamentár FRETILIN, Aniceto Guterres, lori bankada FRETILIN nia naran hato’o sentida kondolénsia kle’an ba antigu deputadu ne’e tanba saudozu nu’udar ema ida ne’ebé iha vizaun ne’ebé no luan tebes.

“Ema ne’ebé iha vizaun ne’ebé boot no luan tanba esperiénsia tempu portugés, tempu Indonézia no iha lejizlatura dahuluk. Nu’udar timoroan, nia fó kontribuisaun uituan ka barak, lori bankada FRETILIN no lori ha’u-nia família hato’o sentidu profunda ba família saudozu nian,” Aniceto Guterres halo intervensaun liuhosi plenária Parlamentu Nasionál.

Aleinde ne’e, Reprezentante Partidu Bankada CNRT, Deputada Bendita Magno hateten, antigu deputadu ne’e ninia kontribuisaun boot tebes liuliu iha aprovasaun Konstituisaun RDTL iha primeiru lejizlatura.

“Ne’e merese duni tanba partisipa iha aprovasaun Konstituisaun RDTL iha primeiru lejizlatura. Bankada CNRT sente lakon timoroan potensiál ida. Partidu CNRT ho laran susar tebes hato’o boa viajen ba saudozu Clementino Amaral,” Deputada Bendita Magno hateten.

Iha fatin hanesan, Reprezentante Bankada PLP, Deputada Rosalia Ximenes mós hato’o sentida kondolénsia kle’an ba saudozu no oan-ki’ak sira.

Liuhosi plenaria ne’e, Bankada KHUNTO, António Nobre Amaral Tilman, ho laran triste hato’o sentida kondolénsia ba família enlutada tanba lakon ona aman di’ak ida ne’ebé oan sira haodmi .

“Ita-nia saudozu kontribui ona buat barak ba ita-nia nasaun iha lejizlatura dahuluk nian. Tanba ne’e, KHUNTO hato’o sentida solidariedade domin no kondolénsia kle’an ba saudozu Clementino dos Reis Amaral,” Deputadu KHUNTO ne’e hateten.

Entretantu, hosi Bankada Partidu Demokrátiku, Mariano Assanami Sabino, lori bankada no família demokrátiku nia naran jato’o sentida kondolensia ba família no oan sira.

“Bankada Demokrátiku no família demokrátiku ho laran triste, tanba saudozu sai tiha ona defensór ba direitu umanu no sempre fó hanoin ho hakmatek ba ema seluk no lembransa ne’ebé husik hela. Deskansa ho hakmatek. Ami sei la haluha saida mak ita boot halo,” Assanami subliña.

Ikus liu, reprezentante Bankada UDT/FM, Francisco Carlos Xavier, rekoñese antigu deputadu ne’e ninia kontribuisaun iha lejizlatura dahuluk tanba Konstituisaun RDTL sai ona matadalan ba Timor-Leste.

“Ami hato’o ami-nia sentidu kondolénsia kle’an ba señor Clementino Amaral no espesialmente ba oan-ki’ak sira,” nia deklra.

Hafoin mate-isin sai hosi Parlamentu Nasionál, mate-isin lori kedas ba Semitériu Becusse hanesan fatin deskansa ikus ba antigu deputadu Clementino dos Reis Amaral, hodi hakmatek ho dame.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here