Primeiru-Ministru, Taur Matan Ruak. Imajen/ Egas Cristovao

DILI, 08 marsu 2020 (TATOLI)–Primeiru-Ministru (PM), Taur Matan Ruak, kongratula partidu politiku sira ne’ebé forma ona koligasaun foun, ne’ebé halo esforsu makaas liuhosi movimentu politiku atu kompleta rekizitu balun no kumpre regra sira liuliu lei ba partidu politiku sira nian. 

Taur espresa hanoin ida ne’e, hafoin ensera Kongressu Nasionál Partidu Kmanek Haburas Unidade Nasionál Timor Oan (KHUNTO) ba daruak iha domingo (8/3/2020) iha Centro Convenções Dili (CCD).

“Ha’u kongratula sira ba esforsu ne’ebé halo atu bele kompleta rekezitu no kumpre ita-nia regra sira, ita-nia lei partidu politiku haruka. Tanba ne’e, ha’u kontente no ha’u kontente liu bainhira mai to’o haree Kongressu partidu KHUNTO nian, partidu ida ne’e joven no maioria joven maibé kapaas loos. Ha’u orgullu loos, hanesan aman no maun,” dehan Taur Matan Ruak.

Atuál Prezidente Partidu Libertasaun Populár (PLP) ne’e promote, nia sei reza makaas atu jerasaun foun bele kontinua buat ne’ebé jerasaun tuan sira halo ona.

“Ha’u mós reza makaas loos atu sira ne’ebé jerasaun foun, tenke hatutan buat ne’ebé jerasaun tuan sira halo ona. Ha’u mós fiar metin katak tinan sanulu oin mai, bainhira ami iha aitonka hotu ona, maibé ami kontente tanba ami mós iha ami-nia oan sira,” nia hateten.

Entretantu, Partidu polítiku ne’en ne’ebé forma Ona koligasaun foun kompostu husi CNRT, PD, KHUNTO, PUDD, UDT no FM, ida-idak realiza ona ninia Kongressu estraordinária hodi responde ba pedidu hosi Prezidente Repúblika (PR), Francisco Guterres “Lú Olo”, iha loron 6 fulan marsu, hafoin halo audiénsia ho líder másimu husi partidu neen refere.

Jornalista : Cipriano Colo

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here