Primeiru Ministru, Taur Matan Ruak. Imajen/Antonio Goncalves

DILI, 08 marsu 2020 (TATOLI)–Primeiru Ministru (PM), Taur Matan Ruak, dezeja no iha esperansa boot katak Partidu Kmanek Haburas Unidade Nasionál Timor Oan (KHUNTO) sei sai boot no sei fó Kontribuisaun ba dezenvolvimentu iha nasaun ne’e. 

“Ha’u fó parabens ba estrutura tomak, ba militantes no simpatizante sira, apoiantes KHUNTO nian, ha’u dezeja katak sira kontinua sai partidu ida mós ne’ebé boot no iha papél ba dezenvolvimentu Timor nian. Fó sira nia kontribuisaun, domin, partisipasaun ba dezenvolvimentu ita-nia nasaun nian,” dehan Taur Matan Ruak iha enseramentu kongresu Nasionál daruak KHUNTO iha Centro Convenções Dili (CCD), ohin. Taur espresa ninia dezeju perante kongresista sira.

Líder másimu oitavu Governu ne’e mós fó parabens ba estrutura eleitu KHUNTO nian ne’ebé eleitu ba períudu 2020-2024.

“Ha’u fó parabens ba konselleiru superiór KHUNTO, José dos Santos “Naimori” Bucar, no mós Prezidente Armanda Berta dos Santos ho nia estrutura tomak tanba bele hetan fiar ba mandatu foun 2020-2024. Apresia tebes ho komisaun organizadora ne’ebé organiza kongresu ne’e, maske simples maibé ho dignidade boot. Aleinde ne’e, ha’u mós agradese tanba apezar de mobiliza joven sira barak mai sidade, buat hotu la’o di’ak loos,” Taur hateten.

Iha fatin hanesan, konselleiru másimu Partidu KHUNTO, José dos Santos “Naimori” Bucar, agradese tanba sente katak Partidu KHUNTO ondradu tebes hodi hetan partisipasaun espesiál husi Primeiru-Ministru Taur Matan Ruak ho espoza no hodi ensera Kongressu ida ne’e.

Naimori promete no husu kongresista sira atu banati tuir lala’ok no atetude ne’ebé líder nasionál sira, inklui Taur Matan Ruak hatudu ona atu sai matadalan hodi kontribui ba dezenvolvimentu rai ida ne’e nian.

“Ami hakruuk ba ami-nia aman sira, ami-nia maun sira, tanba ho imi-nia matenek mak ohin loron ami bele hamriik iha ne’e. Matenek ne’e imi nian, ami empresta de’it. Ami Sei uza matenek ne’ebé iha hodi kontribui ba dezenvolvimentu rai ida ne’e nian liuhosi partidu KHUNTO,” Naimori hateten.

Entretantu, Kongressu Nasionál ne’ebé hala’o iha loron 6-8 fulan marsu, partisipa husi delegadu sira hamutuk 836 mai hosi munisipiu 12 inklui Rejiaun Administrativa Espesiál Oe-Cusse Ambeno (RAEOA).

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here