Vise Prezidente Komisaun A ne'ebé trata asuntu Konstituisaun no Justisa, Francisco de Vasconcelos.

DILI, 09 marsu 2020 (TATOLI)—Partidu Libertasaun Populár (PLP) preokupa ho Partidu Congresso da Reconstrução de Timor (CNRT) tanba husik tiha koligasaun anterior maibé to’o agora seidauk fó solusaun ba impase polítika.

“Ami preokupa tanba to’o agora seidauk fó solusaun tanba objetivu koligasaun ne’e hodi sai hosi impase ida-ne’e. Sira seidauk bele sai tanba sira la hatene dalan,” dehan Deputadu PLP, Francisco de Vasconselhos, ba jornalista sira iha resintu Parlamentu Nasionál, ohin.

Nia afirma, aprezentasaun kandidatura iha pre-eleitorál iha implikasaun barak tanba kuandu Aliansa Mudansa ba Progresu ne’e la eziste ona, entaun lei partidu polítiku ne’e CNRT la’ós segundu mais votadu ona.

“Agora problema ida ba sira mak ne’e sira buka para prenxe rekezitu de’it, 34 kadeira, ida foin lalais ne’e 36 ne’e CNRT mós iha laran. Entaun, tanbasá mak husik tiha ida-ne’e ba fali seluk,” nia kestiona.

Deputadu PLP ne’e, konsidera koligasaun foun ne’ebé lidera hosi CNRT hanesan koligasaun konfuzaun.

“Konfuzaun tanba lei partidu polítiku dehan labele halo koligasaun dentru koligasaun ida sei eziste hela. Koligasaun foun ne’e só halo baralla de’it situasaun tanba sira la hatene atu la’o ba ne’ebé. Buat hotu-hotu lufu-lafu,” dehan nia.

Nia afrima, kestaun ida Prezidente Repúblika haruka fila ne’e hanesan rekezitu de’it hodi prenxe.

“Halo ona sala aumenta tan sala. Ne’ebé, solusaun laiha ida. Ne’e dehan katak halo konfuzaun. Koligasaun ida só lori konfuzaun. Ne’e atu baralla de’it situasaun. Sei ba dalan seluk tanba ida horibainhira ne’e prenxe rekezitu hela, halai tiha depois forma fali ida,” Deputadu PLP ne’e hateten.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here