Ministru Defeza no Ministru Interiór Internu, Filomeno de Jesus da Paixão entrega diploma mellor klasifikadu ba formadu na’in haat (4) ne’ebé hetan valór exelente. Imajen/MI

DILI, 09 marsu 2020 (TATOLI)- Komandu Polisia Nasionál Timor-Leste (PNTL), ohin, hala’o enserramentu ba primeiru kursu Promosaun Ofisiál Inspetór na’in 52 iha Sentru Formasaun Akademia PNTL Comoro Dili.

Membru na’in 52 termina ona sira nia kursu durante fulan sia (9) hahú hosi loron 7 jullu 2019 too loron 30 janeiru 2020 iha Sentru Akademia Formasaun Polisia (SFP).

Ministru Defeza no Ministru Interiór Internu, Filomeno de Jesus da Paixão, afirma,   governu kontinua suporta Komandu PNTL hodi realiza Kursu Promosaun ba Ofisiál Inspetór (KPOI) nu’udar kursu dahuluk ne’ebé hala’o ba Ofisiál Inspetór Asistente hodi aprende teoria no pratika iha terrenu tuir tempu ne’ebé termina ona.

Ministru Filomeno espera katak, liuhosi formasaun ne’e membru sira bele dezenvolve-aan di’ak liután atu sai komandante ida di’ak ba sira nia-aan no dezenvolvimentu Instituisaun PNTL tuir ninia planu estratéjiku.

Nia husu ba membru PNTL sira atu uza matenek ne’ebé sira hetan durante kursu bele ezekuta iha knaar servisu foun ne’ebé sira sei hetan hodi hametin liután lutu seguransa ba povu no nasaun.

Komandante Jerál PNTL, Komisariu Faustino da Costa, tau deviza ba mellor klasifikadu ba formandu na’in haat (4) ne’ebé hetan valór exelente. Imajen/MI

Iha fatin hanesan, Komandante Jerál PNTL, Komisáriu Faustino da Costa hato’o parabéns ba formadu Inspetór Asistente sira ne’ebé tuir kursu too remata.

Nia dehan, PNTL sei kontinua hala’o nia knaar tuir Konstituisaun hodi garante seguransa ba ema hotu hodi kontribui ba dezenvolvimentu Timor-Leste.

PNTL daudaun ne’e iha ona Planu Estratéjiku Dezenvolvimentu Nasionál atu hala’o nia knaar ho imparsialidade hodi hetan fiar hosi estratéjia nasionál no internasionál.

“Formasaun ida ne’e bazeia ba rejime promosaun hodi realiza liuhosi formasaun ida di’ak iha formasaun fulan sia nia laran,” tenik nia.

Komandu PNTL mós koloka membru sira ne’e atu ba servisu iha fatin foun liu-liu munisípiu sira ne’ebé fatin mamuk presiza atu prienxe.

Iha parte seluk, Komandante Sentru Formasaun Akademia PNTL, Superintendente, Arquimino Ramos hato’o agradese tanba formasaun ne’e konsege hala’o ho susesu no hetan apoiu másimu hosi instituisaun Estadu Timor-Leste.

Promosaun ne’e hala’o de’it ba Inspetór Asistente na’in 52 no membru na’in ida adia fali ba tempu seluk, tanba sei submete hela ba prosesu investigasaun ba kazu balun ne’ebé membru ne’e komete.

Nia dehan, liuhosi promosaun ne’e nu’udar istória importante ida ba Komandu PNTL hodi rekoñese ninia membru sira nia kontribuisaun ba dezenvolvimentu instituisaun PNTL.

Arquimino hatutan, formasaun ne’e di’ak tebes bazeia ba kondisaun ne’ebé Timor-Leste iha no prinsipál hodi forma karater no kompeténsia hodi assume kargu iha futuru tuir rejime promosaun PNTL nian.

Nia hatutan,  prosesu formasaun atu muda klase sarjentu ba ofisiál superior tenke tuir sistema no polítika formasaun ida ne’ebé di’ak relevante ho situasaun Timor-Leste.

Ministru Defeza no Ministru Interiór Internu, Filomeno de Jesus da Paixão akompaña hosi Komandante Sentru Formasaun Akademia PNTL, Superintendente, Arquimino entrega mós diploma mellor klasifikadu ba formadu na’in haat (4) ne’ebé hetan valór exelente  18,75 no valór mínimu 13,20.

Membru na’in haat ne’ebé hetan klasifikasaun exelente maka hanesan, Cristian da Costa Diaz, Aurelio Fernandes, Maria José Camerão, ho Elfieh Gonçalves Pereira.

Komandu PNTL entrega mós sertifikadu rekoñesimentu ba instituisaun estadu sira hanesan, KAK, IDN inklui komandante GNR no komandante PNTL sira ne’ebé fó apoiu ba formasaun durante  fulan (9) ne’e.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here