DILI, 09 marsu 2020 (TATOLI)-Ministériu Saúde koloka ona ema na’in 32, kompostu hosi profisionál Saúde, médiku, enfermeiru, seguransa ho seluk tan ba hodi fó atendimentu ba pasiente coronavirus iha fatin izolamentu Tibar, Postu Administrativu Bazartete, Munisípiu Liquiça.
”Agora ami presiza tan lista sira husi Munisípiu sira tanba ita haree nivél nasionál maibé bainhira mosu iha munisípiu saida mak ospitais referais sira halo,” relata, Diretóra Prestasaun Saúde, Odete Viegas da Silva ba Jornalista sira iha ninia servisu fatin, Caicoli, Dili, ohin.
Notísia Relevante :Sidadaun Itália Asegura Hela iha Klínika STAMFORD MEDICAL LDA
Fatin izolamentu Tibar hanesan kuarantena ba pasiente COVID-19 tanba ne’e maka persiza koloka rekursu umanu ho sufisiente hodi fó tratamentu saúde.
Kona-ba Sidadaun Itália mane ida ne’ebé maka dadaun ne’e asegura iha Klínika STAMFORD MEDICAL LDA, Diretóra ne’e dehan, hetan ona atendimentu hosi ekipa médiku hodi hein resultadu teste hosi ospitál Melbourne Austrália.
Resultadu teste maka indika suspeitu ne’e positivu hetan infesaun Coronavirus, Ministériu Saúde sei transfere kedas pasiente ne’e ho ambulansia ne’ebé prepara ona.
Jornalista : Felicidade Ximenes
Editór : Agapito dos Santos
