Diretór DNRN, Victor da Costa Neto. Imajen/Osória Marques

DILI, 09 marsu 2020 (TATOLI) – Orsamentu Jerál Estadu (OJE) 2020 ne’ebé foin lalais ne’e sumba iha Parlamentu Nasionál fó implikasaun mós ba servisu Ministériu Justisa (MJ) nian liu-liu relasiona atu estabelese tan mákina emisaun  pasaporte eletróniku iha munisípiu sira.

Notísia Relevante : MJ Sei Desentraliza Emisaun Pasaporte ba Baucau

“Ba atividade ne’e agora suspende lai  tanba kestaun ne’ebé ita nia nasaun enfrenta hela ho impasse liga ho orsamentu ne’ebé sumba hela. Maibé hanesan ema tékniku no funsionáriu prontu uainhira hein karik orientasaun ruma hosi ministériu hodi kontinua,”  hateten Diretór Diresaun Nasionál Identifikasaun Sivíl no Rejistu Kriminál, Victor da Costa Neto ba Ajénsia Tatoli, ohin, via telefone.

Diretór Victor da Costa Neto informa, sira nia parte finaliza hodi monta uluk ona ekipamentu no mákina emisaun pasaporte eletróniku iha munisipiu haat (4)  hanesan Lautem, Viqueque, Manauto ho Baucau. Enkuantu iha munisípiu neen (6) seluk hanesan Ermera, Liquiça, Aileu, Covalima, Manufahi no Ainaro seidauk bele kontinua no sei suspende.

“Kona-ba ekipamentu no mákina preparadu hela, maibé difikuldade mak orsamentu lojístika nian tanba ekipa tékniku sira presiza uainhira atu tun ba munisípiu instala,” Victor Neto hateten.

Notísia Relevante : MJ Sei Loke Atendimentu Pasaporte Eletróniku iha Munisípiu

Diretór Diresaun Nasionál Identifikasaun Sivíl no Rejistu Kriminál Victor da Costa Neto hatete, bainhira iha munisipiu 6 ne’e kuandu estabelese hotu ona ekipamentu no mákina sira, governu sei hahú halo lansamentu iha nasionál, nune’e nia dehan, bele funsiona balkaun atendimentu pasaporte eletróniku iha munisípiu sira ne’e.

Tuir polítika no programa oitavu governu konstitusionál hosi Ministériu Justisa, durante mandatu tinan lima, sei estabelese atendimentu emisaun pasaporte eletróniku iha munisípiu 10 ho nia objetivu lori atendimentu públiku hakbesik ba povu liu tan.

Notísia Relevante : DNRN Instala Sistema Pasaporte Eletrónika iha Munisípiu Haat

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here