Ministra Finansa ein ezersísiu, Sara Lobo Brites. Imajen Tatoli/Egas Cristovão

DILI, 09 marsu 2020 (TATOLI)Ministra Finansa ein ezersísiu, Sara Lobo Brites hala’o enkontru semanál ho Primeiru-Ministru (PM), Taur Matan Ruak, hodi deskute kona-ba kondisaun balun ne’ebé Governu presiza rezolve durante iha rejime duodesimál.

Kondisaun ida ne’ebé presiza rezolve maka pagamentu ba idozu no invalidez, ne’ebé ninia pagamentu ba kada fulan-neen.

“Kada segunda, ha’u sempre hasoru Primeiru-Ministru hodi relata kona-ba servisu Ministériu Finansa nian no simu orientasaun balun. Entaun enkontru ohin, iha orientasaun ba pagamentu ferik-katuas ne’ebé maka simu fulan-neen dala-ida, maibé Governu tantu banku sira laiha rekursu barak atu halo pagamentu mensál maibé halo pagamentu ba kada fulan-neen. Ami seidauk selu tanba atu selu presiza orsamentu fulan-neen dala-ida, maibé agora ita moris ho orsamentu doudésimu. Ami sei haree hela asuntu ne’e”, dehan Sara Lobo iha Salaun Ministériu Finansa, Aitarak-Laran, segunda ne’e.

Nune’e, kada tinan Governu halo pagamentu ba idozu no invalidez iha faze rua, faze dahuluk hahú janeiru to’o juñu no faze daruak hahú jullu to’o dezembru.

Governante ne’e haktuir, durante sorumutu ho Xefe Governu, Ministra mós aprezenta proposta revizaun ba Lei Orsamentu Jestaun Finanseira, artigu 31 atubele hato’o ba Parlamentu Nasionál (PN) hodi diskute no hetan aprovasaun, nune’e Governu bele iha kbiit atubele atende situasaun balun durante rejime doudesimál.

“Tanba iha limitasaun barak liuliu embaixada sira tenke selu sira nia arendamentu ba tinan tomak no labele selu fali ba fulan-ida nian,tanba ne’e risku ida no ema bele husu taka ita-nia embaixada sira iha rai-li’ur”, nia subliña.

Nune’e mós, Ministra Sara no PM Taur ko’alia kona-ba situasaun sira seluk hanesan Coronavirus no dezastre naturál sira.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here