Ministra Finansa ein ezersísiu, Sara Lobo Brites. Imajen Tatoli Tatoli/Egas Cristovão

DILI, 09 marsu 2020 (TATOLI) – Ministra Finansa ein ezersísiu, Sara Lobo Brites, husu ba direjente entidade Autónomo sira atu labele troka ka muda pesoál sira ne’ebé hetan ona formasaun hosi Diresaun Jéral Tezouru (DJT).

Governante ne’e ko’alia asuntu ne’e, relasiona ho formasaun husi DJT hodi kapasita Ajénsia Públika Autonoma sira, oinsá atu prepara rasik relatóriu finanseira anuál.

Tuir Sara Lobo, bainhira pesoál sira ne’ebé tuir ona formasaun maka muda fali ba fatin seluk ka troka, sei difikulta bainhira prepara relatóriu finanseira anuál.

“Ha’u husu ba diretór sira atu uza pesoál ne’ebé maka hetan tiha ona formasaun, labele halo mudansa sé lae ami mós preokupa tebes tanba treina tiha ema-ida, maibé mai fali ema seluk. Ami hakarak muda ami ninia estatus ba level seluk, katak hakarak halo de’it monitorizasaun maibé imi rasta ami tun filafali katak repete hela de’it atividade ne’ebé hanesan. Entaun husu kooperasaun atu mantein”, informa Sara Lobo Brites iha ámbitu abertura formasaun ba Entidade Autonóma sira kona-ba oinsá prepara relatóriu finanseira anuál, iha Ministériu Finansa, Aitarak-laran, segunda ne’e.

Notisia relevante: DJT Kapasita Entidade Autónoma Sira Atu Prepara Relatóriu Finanseira Anuál

Atuál Vise-Ministra Finansa ne’e realsa, durante ne’e seidauk akontese mudansa maibé nafatin husu atu labele akontese nune’e labele difikulta servisu Ministériu Finansa (MF) nian.

“To’o agora ami seidauk iha informasaun katak pesoál sira ne’ebé ami kapasita hetan mudansa, maibé ami hakarak prevene ba futuru tanba formasaun sira ne’e atu ema bele entende didi’ak sistema Governu ninian, oinsá uza sistema, entende didi’ak oinsá prepara relatóriu liuhosi formasaun lubuk ida. Sé iha klaran maka sira nia direjente la fó tuir formasun kontinuidade, entaun sira la hetan materiál ne’ebé la naton, aat liu maka troka ema”, nia dehan tan.

Nia refere liután, kona-ba entidade sira ne’ebé tuir formasaun, bainhira tuir tiha formasaun hosi DJT maka la konsege prepara relatóriu ho di’ak maka MF sei relata iha relatóriu hodi aprezenta ba Parlamentu Nasionál hodi katak Ajénsia Públika Autonóma ida-ne’e seidauk iha kbiit rasik atu prepara relatóriu finanseira anuál, maski hetan tiha ona kapasitasaun hosi entidade relevante.

“Ikus mai maka ajénsia balun la konsege presta, ami sei inklui iha relatóriu finansa-nian ba iha Kámara Konta. Maibé ha’u fiar katak ita boot sira lakohi halo ida ne’e no hatudu rezultadu ladi’ak, tanba hotuhotu hetan formasaun hanesan maibé balun bele aprezenta no balun lakonsege aprezenta. Ne’e duni tenke esforsa-an hodi bele kumpre kalendáriu tanba finansa disponível atubele atende, ho nune’e ita bele kumpre saida maka iha lei”, nia akresenta.

Responsável Finansa ne’e dehan, bainhira ajénsia sira la kumpre signifika la kumpre lei no sei ariska mós estatutu hanesan ajénsia públika autonoma, tanba hatudu katak ajénsia hatene de’it ezekuta osan maibé lahatene husi ne’ebé maka osan ne’e mai.

“Kontabilidade ne’e importante tebes tanba ita promove transparénsia ba utilizasaun rekursu osan Estadu nian. Entaun sé akontese karik ajénsia públika autonoma ida ka rua mak la konsege presta, ami sei relata no mós bele sujeitu ba auditoria sira tuir mai. Risku liu maka foti fali ita boot sira nia estatutu hanesan ajénsia públika autónoma tanba ajénsia hirak ne’e fó ona kbiit ba ita boot sira atu jere rasik osan. Tanba jere osan ne’e labele haree de’it ba gastu maibé oinsá bele rekolla reseita no mós presta filafali relatóriu”, nia salienta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here