Membru PN hosi Bankada PD, António da Conceição ‘Kalohan'. Imajen TATOLI/António Gonçalves

DILI, 09 marsu 2020 (TATOLI)—Koligasaun foun ne’ebé lidera hosi Partidu Congresso Nacional da Reconstrução de Timor (CNRT), sei haruka karta foun ba Prezidente Repúblika, Francisco Guterres “Lú Olo”, tanba partidu koaligasaun foun refere prenxe ona rekezitu.

“Orsida lokraik, ha’u hanesan portavós sei hasoru malu ho Prezidente Koligasaun foun hodi haree konteúdu karta atu haruka karta ba Prezidente Repúblika. Se orsida karta ne’e prontu hatama kedas. Se ladauk prontu, aban ami hatama,” dehan Portavós Koligasaun Foun no Atuál Sekretáriu Jerál Partidu Demokrátiku, António da Conçeição “Kalohan”, ba jornalista sira iha Resintu Parlamentu Nasionál, ohin.

Portavós Koligasaun ne’e hateten, partidu ne’ebé envolve iha koligasaun foun ne’e kaer ba rezultadu konferénsia sira-ne’ebé halo ona hodi fó resposta maibé detalladu ba Prezidente Repúblika.

“Saida mak ami ko’alia no saida mak prezidente husu, ami kumpri ona. Agora só hein de’it katak prezidente atu dehan saida. Simu koligasaun ida-ne’e ka la simu. Se prezidente la simu entaun tenke fó alternativa seluk. Ami-nia esforsu atu salva nasaun mak ne’e ona. Dalan laiha ona, só prezidente mak dehan ami viola tan buat ruma,” nia dehan.

Portavós ne’e akresenta, koligasaun foun ne’e preparadu nanis se bainhira prezidente simu karta koligasaun foun ne’e ho desizaun ne’ebé loos no momoos.

“Se prezidente simu, iha loron ne’eduni, ami sei hatama surat inidijitasaun Primeiru-Ministru para depois bele iha ona sinál ida katak Governu foun hamriik no Primeiru-Ministru ho Prezidente Repúblika sei haree kona-ba membru Governu sira,”  nia hateten.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here